Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирусдан вафот этди. Унинг ўлими 19 июль куни қайд этилган, бироқ ҳозиргача ҳеч ерда эълон қилинмаган. Бу ҳақда шифокорнинг опаси Маҳмуда Мурзаевага таяниб, «Gazeta.uz» хабар берди.
«Синглим умрининг 40 йилини шу ишга бағишлади, шундан 30 йили давомида Чилонзор СЭОМда шифокор, кейинроқ — бактериология лабораторияси мудири бўлиб ишлади. Ёши 60 дан ошгани сабаб нафақага чиқишини сўрасак ҳам, ишини ташлаб кета олмаслигини, ортга чекинмаслигини айтарди. Ишни охиригача етказиб, кейин пенсияга чиқаман дерди», — дейди марҳуманинг синглиси.
Марҳоба Аҳмедова коронавирусга 13 июль куни тест топширган ва натижасини 16 июль куни олган. У COVID-19’га чалинганлар билан мулоқотда бўлганлар қаторига киритилган.
Маҳмуда Мурзаеванинг маълум қилишича, унинг синглиси пандемия бошланганидан буён деярли дам олиш кунларисиз ишлаган ва аҳолидан COVID-19’га тест қабул қилган.
«Синглимдан ҳар куни касаллар билан ишлагани учун коронавирусга тест топширишини сўрадим. Натижада у топширди. Ўша куни унинг қўл остида ишлайдиган шифокорда коронавирус аниқланган эди. Биринчи сафар синглимда вирус аниқланмади, бироқ бир ҳафта ўтгач, унинг тана ҳарорати кўтарила бошлади ва навбатдаги тест унда COVID-19 борлигини тасдиқлади», — дейди у.
Бундан ташқари, Маҳмуда Мурзаеванинг таъкидлашича, касалхоналардан жойни танишлар орқали топишга тўғри келган. Олти кун шифохонада ётган Аҳмедованинг аҳволи оғирлашгач, уни кислород аппаратига улашган, аммо бу ҳам ёрдам бермаган, аёл вафот этган.
«Ўзингиз ҳам кўриб турибсиз жойлардаги раҳбарлар масъулиятсизлик қилмоқда. Ҳалигача… У ҳам мукофотга, эътирофга лойиқ эди, бироқ унинг раҳбарияти… бунда шаҳар СЕОМ ва Чилонзор СЭОМ раҳбарияти айбдор — ҳеч ерда синглимнинг ўлимини эълон қилишмади… Кеч бўлса ҳам, ҳаммасини жой жойига қўйиш керак», — дея таъкидлайди Маҳмуда Мурзаева.
Марҳоба Аҳмедова «Дарё» ҳисоби бўйича коронавирус оқибатида вафот этган Ўзбекистондаги 113 бемор ҳисобланади. Соғлиқни сақлаш вазирлиги статистикаси бўйича эса ҳозирга қадар 106 кишига COVID-19 қурбонига айланган.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 22 июлда Бош прокурорнинг собиқ ўринбосари, ҳозирда Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Қорақалпоғистон Республикаси Қонликўл тумани ҳокими 36 ёшли Даулет Толибаев коронавирус асоратларидан вафот этгани хабар қилинган. Бироқ ушбу ҳолатлар ҳақида ССВ томонидан айни вақтгача ахборот берилмаган.
Таниқли режиссёр Сарвар Каримов ҳам 17 июль куни отаси коронавирус инфекциясидан вафот этгани, аммо унга ташхис қўйилмаганини маълум қилганди.
Изоҳ (0)