Соғлиқни сақлаш вазирлиги коронавирусга чалинган қорақалпоғистонлик 37 ёшли эркакнинг вафот этганини тасдиқлади.
Аввалроқ Қорақалпоғистон Республикаси Қонликўл тумани ҳокими Даулет Толибаев бир неча кун олдин коронавирусга чалиниб, касалхонага ётқизилгани, бироқ кўрсатилган муолажаларга қарамай бемор вафот этгани тўғрисида хабар берилганди.
Соғлиқни сақлаш вазирлигининг маълум қилишича, Қорақалпоғистон Республикаси Нукус шаҳрида яшаган 37 ёшли Даулет Толибаевда иситма, умумий ҳолсизлик ва қуруқ йўтал пайдо бўлгач, жорий йил 10 июль куни республика юқумли касалликлар шифохонасига ётқизилган.
Унга COVID-19 инфекциясининг ўта оғир кечиши, икки томонлама пневмония, ўткир респиратор дистресс синдром ташхиси қўйилган. Хасталик ўткир нафас етишмовчилиги, мия шиши асоратлари билан кечган. Шунингдек, беморда семизликнинг 3-даражаси, юрак ишемик касаллиги каби ҳамроҳ касалликлар ҳам бўлган.
Шифохонада беморнинг даволаниши давомида шифокорлар томонидан онлайн консультация ва консилиумлар қилинган, даволаш жараёни мутахассислар тавсияси асосида олиб борилган.
Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак қон-томир етишмовчилиги, мия шишидан вафот этган.
Бу ССВ статистикаси бўйича 107-ўлим ҳолати ҳисобланади. «Дарё» ҳисоб-китобига кўра эса Ўзбекистондаги коронавирус қурбонлари 113 нафарни ташкил этмоқда.
Изоҳ (0)