Андижонда қарзини қайтара олмаган қўшнисини калтаклаб, унинг ўлимига сабабчи бўлган шахсларга нисбатан жиноят иши қўзғатилди. Бу ҳақда Тергов департаменти хабар берди.

Маълумотларга кўра, 20 июль куни соат 23:00 да Булоқбоши тумани «Учтепа» МФЙда яшовчи 28 ёшли К.А., қўшниси Р.С.дан (43 ёш) 1000 АҚШ доллари миқдоридаги қарзини сўраб келган вақтида ўзаро жанжаллашиб қолган. Жанжал давомида К.А., таниши 21 ёшли Н.Қ. ҳамда укалари 25 ёшли А.А., вояга етмаган 17 ёшли О.А. билан биргаликда Р.С.ни ўша ердаги ёғоч таёқ билан танасининг турли жойларига уриб, тан жароҳати етказган. Натижада Р.С. олган тан жароҳатлари оқибатида ҳодиса жойида вафот этган.

Ҳодиса жойини кўздан кечириш давомида Р.С.га тан жароҳати етказилган бир дона таёқ ашёвий далил тариқасида расмийлаштириб олинган.

Мазкур ҳолат юзасидан Булоқбоши тумани ИИБ ҳузуридаги Тергов бўлими томонидан Жиноят кодексининг 104-моддаси 3-қисми «д» банди (Жабрланувчининг ўлимига олиб келган қасддан баданга оғир шикаст етказиш) билан жиноят иши қўзғатилган.

Жиноят иши бўйича К.А., А.А. ва Н.Қ. гумон қилинувчи тариқасида жалб қилиниб, процессуал тартибда ушланган. Ҳозирда вояга етмаган 17 ёшли О.А.нинг ҳаракатларига ҳуқуқий баҳо бериш чоралари кўрилмоқда, дастлабки тергов ҳаракатлари олиб борилмоқда.