«Спартак» Остон Ўрунов трансфери учун қанча маблағ таклиф қилаётгани маълум бўлди

Москванинг «Спартак» клуби «Уфа»нинг 19 ёшли ўзбекистонлик ярим ҳимоячиси Остон Ўруновни сотиб олишга яқин турибди.

Sport24 журналисти Максим Алланазаровга кўра, Москва клуби Ўрунов учун «Уфа»га 2 миллион евро тўлайди. Агар футболчи икки йилни «Спартак»да ўтказса, «Уфа» бонус тариқасида яна 2 миллион евро олади.

Шунингдек, томонлар яна бир вариантни кўриб чиқмоқда: «Уфа» дастлаб Ўрунов учун 2 миллион евро олади, кейин эса «Спартак»нинг Остонни бошқа клубга трансфер қилишидан тушадиган маблағнинг тенг ярмига эга чиқади.

Аввалроқ «Спартак» футболчининг трансфер масаласини ҳал этгани ва томонлар айни дамда Ўруновнинг шахсий шартномаси масаласида музокара олиб бораётгани ҳақида хабар берилганди.

«Уфа» Остон Ўруновни шу йилнинг февраль ойида ўз сафига қўшиб олган. Ўрунов Россия Премьер Лигасида 10 ўйинда майдонга тушиб, 2 та сариқ карточка олди.