Tesla ва SpaceX асосчиси Илон Маск дунёнинг энг бой беш кишиси қаторига кирди. Бу ҳақда Meduza нашри Forbes журналига таяниб хабар берди.
20 июль Tesla акциялари савдоси натижаларига кўра, Маскнинг бойлиги 74,2 миллиард долларга баҳоланди.
Американинг Forbes нашри берган маълумотга кўра, йил бошида Маск дунёнинг энг бой одамлари рейтингида атиги 37-ўринни эгаллаган эди. Унинг бойлиги Tesla акцияларининг нархи кўтарилиши билан боғлиқ равишда ошган.
20 июль куни компания акцияси нархи 9,5 фоизга кўтарилиб, бир дона акция 1 664 АҚШ долларини ташкил қилди. Уч ҳафта ичида, 29 июндан бошлаб, акциянинг қиймати 60 фоизга ошди. Йил бошидан бери эса қарийб 300 фоизга кўтарилган.Tesla ҳозирда нафақат бозор ҳажми 304,5 миллиард долларга тенг энг қимматбаҳо автомобиль ишлаб чиқарувчи, балки Ford, Ferrari, General Motors ва BMW’дан ҳам қимматроқ бўлган компания ҳисобланади.
Маскдан юқоридаги ўринларни Facebook асосчиси Марк Цукерберг (4-ўрин, 90 миллиард доллар), Microsoft асосчиси Билл Гейтс (3-ўрин, 113 миллиард доллар), Louis Vuitton Moet Hennessy президенти Бернард Арнаулт (2-ўрин, 114 миллиард доллар) ва Amazon бош директори Жефф Безос (1-ўрин, 189 миллиард доллар) банд қилган.
Мавзуга доир: Хакерлар Билл Гейтс, Илон Маск ва Кане Уэстнинг Twitter аккаунтларини бузиб кириб, биткоин талаб қилди
Изоҳ (0)