Қашқадарё санитария-эпидемиология осойишталик марказида қарийб 918 миллион сўмлик бюджет маблағлари талон-торож қилингани аниқланди. Бу ҳақда «Дарё»га Бош прокуратура ахборот хизмати маълум қилди.
Хабарда қайд этилишича, Бош прокуратура ҳузуридаги департаментнинг Қарши шаҳар бўлими томонидан ўтказилган терговга қадар текширувда Қашқадарё вилоят санитария-эпидемиология осойишталик марказининг собиқ раҳбари Ш.Ш, бўлим бошлиғи Б.Б. мансаб ваколатларини суиистеъмол қилгани аниқланган. Ушбу шахсларга нисбатан жиноят иши қўзғатилиб, иш прокуратурага юборилган.
Вилоят СЭОМнинг бир гуруҳ масъуллари, марказ ҳисобига тушиши лозим бўлган 480,1 миллион сўм маблағларини, марказда ишламаган фуқароларга иш ҳақи ҳисоблаб тўлаб борган. Ишлаган ходимларга ортиқча иш ҳақи ҳисоблангани оқибатида давлатга 271,6 миллион сўм зарар етказган.
Шунингдек, «Гипохлорид кальций» дезинфекция воситаси ҳақиқий баҳосидан 166,1 миллион сўм қиммат нархларда сотиб олинган. Шу тарзда жами 917,8 миллион сўм бюджет маблағлари ўзлаштирилган, растрата қилиш йўли билан талон-торож қилинган.
Аввал Молия вазирлигининг Давлат молиявий назорати департаменти томонидан 2020 йилнинг I ярим йиллигида 2 584 та молиявий назорати тадбирлари ўтказилиб, натижада 81,7 миллиард сўм миқдоридаги бюджет пуллари ноқонуний сарфлангани аниқлангани, Навоий вилояти Санитария ва эпидемиология осойишталик маркази мансабдор шахслари Молия вазирлиги ҳузуридаги Инқирозга қарши курашиш жамғармаси ҳисобидан ажратилган 500 миллион сўмдан ортиқ маблағни ўзлаштиргани, Наманганда вилоят санитария-эпидемиологик осойишталик маркази иқтисодчиси 40 миллион сўм пора билан қўлга тушгани ҳақида хабарлар берилган.
Изоҳ (0)