Тошкент шаҳрида шакллантирилган янги койка-ўринлар захираси бўйича маълумот берилди

Тошкент шаҳар ҳокимлиги матбуот котиби Фурқат Маҳмудхўжаев туман ҳокимлари томонидан 2358 та койка захираси шакллантирилганини маълум қилди. Бу ҳақда у АОКА ҳузуридаги штабда ташкил этилган брифингда гапириб ўтди. Шаҳарда жойлашган барча давлат тиббиёт муассасалари хатловдан ўтказилган.

Койкалар захираси туманлар кесимида қуйидагича кўриниш олди:

• Бектемир тумани: 6-сонли шаҳар клиник шифохонасида 110 та койка;
• Мирзо Улуғбек тумани: Республика ногиронлар реабилитация марказида 130 та койка;
• Миробод тумани: 3-сонли шаҳар клиник шифохонасида 100 та койка ҳамда 1-Республика клиник шифохонасида 100 та койка;
• Олмазор тумани: 2-Тиббиёт академияси (ТошМИ-2)да 412 та койка;
• Учтепа тумани: Жаҳон тиллари университети ётоқхонасида 350 та койка;
• Чилонзор тумани: Тошкент вилояти Марказий шифохонасида 120 та койка;
• Юнусобод тумани: Нуронийлар санаторийсида 300 та койка ҳамда Республика ихтисослаштирилган терапия ва тиббий реабилитация илмий-амалий тиббиёт марказида 400 та койка;
• Яшнобод тумани: Нуронийлар санаторийсида 156 та койка, 4-сонли шаҳар клиник шифохонасида 30 та койка, 2-юқумли касалликлар шифохонасида 50 та койка ва Республика ихтисослаштирилган травматология тиббиёт маркази 100 та койка мавжуд.

«Бу йўналишда ишлар давом этмоқда. Лекин бу муаммолар ҳал этилди дегани эмас. Вазиятдан эсон-омон чиқиб кетишимиз учун ҳали кўп меҳнат қилиш зарур», — дея қўшимча қилди Маҳмудхўжаев.

Эслатиб ўтамиз, 8 июль куни Коронавирусга қарши кураш штаби вакиллари иштирокида ўтказилган брифинг давомида профессор Ҳабибулла Оқилов коронавирус инфекцияси белгисиз ўтаётган беморларнинг уй ва меҳмонхонада даволанишига рухсат берилган бўлса-да, Ўзбекистондаги стационарларда кўйка-ўринлар қолмаганини маълум қилганди. Бироқ 9 июль куни брифингда Оқилов пандемиянинг дастлабки кунларидан ҳукумат ўз вазифасини бажариб келаётгани, койка-ўринлар, дори воситалари захираси мавжудлигини билдирган.

Президент Шавкат Мирзиёев 14 июль куни бўлиб ўтган видеоселектор йиғилишида мамлакатдаги эпидемиологик вазиятга яна бир бор алоҳида тўхталиб, мамлакатда коронавирусга қарши кураш учун барча захира ва имкониятлар мавжудлигини маълум қилганди.