Коронавирусга чалинган Маданият вазирлиги ходими Акмал Ирисов 18 июль куни вафот этди. Бу ҳақда вазирлик матбуот хизмати хабар берди.
Маълум қилинишича, Акмал Ирисов 1988 йилда Самарқанд вилояти Пайариқ туманида туғилган. Айни пайтгача у Маданият вазирлигининг Иқтисодий таҳлил, молия ва бухгалтерия бошқармаси бош мутахассиси лавозимида ишлаб келган.
Таъкидланишича, шифокорлар томонидан унга ўткир нафас етишмовчилиги, икки томонлама пневмония, COVID-19 ташхислари қўйилган.
«Маданият вазирлиги томонидан унинг оила аъзолари ва яқинларига таъзия изҳор этиб, чуқур ҳамдардлик билдирамиз», — дейилади хабарда.
Аввалроқ Тошкентда коронавирусга чалинган 67 ёшли эркак вафот этган эди. Марҳум Соғлиқни сақлаш вазирлиги ҳисоб-китоби бўйича мамлакатда коронавируснинг 80-қурбонига айланган.
«Дарё» ҳисоби бўйича коронавирус асоратларидан вафот этганлар сони 82 нафарга етди. 15 июль куни Давлат хизматлари агентлиги ўз Telegram канали орқали агентликнинг Навоий вилояти бошқармасининг масъул ходими Адҳамжон Деҳқоновнинг коронавирус асоратлари оқибатида вафот этганини хабар қилганди. Ушбу ўлим ҳолати ва Маданият вазирлиги ходимининг вафоти Соғлиқни сақлаш вазирлиги томонидан ҳозирча тасдиқланмаган.
Эслатиб ўтамиз, 17 июль куни Соғлиқни сақлаш вазирлиги тақдим этиб келаётган расмий статистикага кўра беш нафар одам COVID-19 касаллиги оқибатида вафот этди. Шунингдек, 17 июль куни таниқли режиссёр Сарвар Каримов Twitter’даги саҳифасида ўзи ва оила аъзолари коронавирус инфекциясига чалингани, отаси COVID-19’дан вафот этганини маълум қилган.
Изоҳ (0)