Футбол бўйича Coca-Cola Суперлига 9-туридан ўрин олган «Қўқон-1912» — «Насаф» учрашувидан (2:2) сўнг меҳмонлар устози Рўзиқул Бердиев ўз фикрлари билан ўртоқлашди.
«Ҳар икки жамоа ҳам ўз савиясига яраша ўйин намойиш этди деб ўйлайман. Икки марта ҳисобда олдинда бориб, ғалабани қўлдан чиқариш аламли бўлди. Ўйин тенг курашлар остида ўтди. Учрашув охирида мезбонлар ҳам ғалабани илиб кетиши мумкин эди. Ғалабани ушлаб қола олмаганимиз, биз учун муваффақиятсизлик бўлиши мумкин. Лекин юқорида таъкидлаганимдек ўйин тенг курашлар остида ўтди. Бу йил Қўқонда жуда яхши жамоа шаклланган.
Айтишимиз керак, ҳар икки голда ҳам дарвозабонларимиз хато қилди. Биз бундай хатоларни кутмаган эдик. Биринчи голдан кейин Машҳурни алмаштирдим. Аммо уни ўрнига тушган Абдувоҳид ҳам тўпга отилишда хато қилди.
Бошланғич таркибда учта ўзгариш қилишимизнинг асосий сабаби айрим футболчиларимизнинг жароҳати бор эди. Қолаверса, ёшларга имкон беришга ҳаракат қилпямиз. Алиқулов бироз бетоб эди, ўзини ёмон ҳис қилди. Раҳматуллаевни ўрнига эса Акмал Мозговойни туширдик, Акмал ёмон ўйнамади ва учинчи ўзгариш Бобур Абдухолиқов билан боғлиқ. Бобур барча ўйинларда майдонга тушиб келмоқда ва унда чарчоқ аломатлари сезилмоқда, яна уни натижалари ҳам қониқарли эмас. Охирги ўйинларда ёшларга ишонч билдиришда давом этяпмиз. Акмал «Металлург» билан ўйинда ғалаба тўпини киритди.
Машғулотларни салқин пайтда ўтказиш мумкин. Лекин расмий ўйинларда бундай қилиб бўлмайди. Ёз ойида ўйнаш осон эмас. Иссиқда ўйнаш футболни темпини пасайтиради. Аммо бу вақтинчалик ҳолат деб ўйлайман. Ҳозир вазият шунақа. Қолаверса ўйинлар мухлисларсиз ҳам бўлмоқда. Аммо ўйинларнинг телевизор орқали жонли намойиш этилаётгани ҳам мухлисларга манзур бўлмоқда. Жанговар ўйиндан мухлислар завқ олди, деб ўйлайман.
Ҳа, бизда ҳар йили иккита ёки учта Остон Ўруновга ўхшаган футболчилар чиқяпти. Остон Россияда, Жасур Яхшибоев Беларусь чемпионатида ўзини кўрсатмоқда. Азиз Ғаниев ҳам ҳали амирликларда ўзини кўрсата олади. Уни имкониятларини биламан. Ёшларга ишониш керак. Бўлмаса қолиб кетаверади. Масалан, кеча «Пахтакор» билан ўйинда ОКМК сафида майдонга тушган ёш футболчи (Ҳожимат Эркинов — изоҳ «Дарё») ёмон таассурот қолдирмади. Бундан қўрқиш керак эмас, ёшларга кўпроқ имконият бериш керак, деб ҳисоблайман. Бу уларнинг ўзига бўлган ишончини ортиради», — дея Бердиев сўзларини келтирмоқда «Championat.asia».
Мазкур натижадар кейин «Насаф» 16 очко билан 6-ўринда бормоқда. «Аждарлар» кейинги утрда «Сўғдиёна»ни қабул қилади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)