Япониядаги гаражларнинг биридан 1995 йилда ишлаб чиқарилган Toyota Supra модели топилди. Афсонавий автомобиль 20 йилдан ортиқроқ ҳаракатсиз турган бўлиб, ҳозирда қайта тиклаш учун юборилган, деб хабар беради Motor.
Toyota Supra Castrol TOM’S Япониянинг дунёга машҳур пойга автомобилларидан бири ҳисобланади. Модель 1995 йилги All Japan GT чемпионатида дебют қилган. Муҳандислар уни Nissan Skyline GT-R’га — 1990 йиллар пойгаларининг асосий етакчисига рақобатчи қилиб яратишга интилган. Улар ўз ғоясини амалга ошириш учун Supra’га 493 от кучи ва 600 Нм айланувчи моментга эга 2,0 литрли турбомотор ўрнатган. Бу Toyota 1995 йилги чемпионатда ғолиб чиқиши учун етарли бўлган.
Автомобиль 1998 йилда сўнгги бор пойгада иштирок этган ва шундан сўнг қаерга «йўқолгани» номаълумлигича қолган. Моделни япониялик муҳандислар Тюгокудаги гаражларнинг биридан топишга муваффақ бўлган. Маълум бўлишича, машина 22 йил ҳаракатсиз тургани сабаб, у таъмирталаб ҳолатга келиб қолган.
TOM’S Rasing компаниясининг япониялик муҳандислари машҳур пойга автомобилини қайта тиклаш учун краудфандинг кампаниясини бошлаб юборган. Ҳозирга қадар 9 минг доллардан ортиқ маблағ йиғилган бўлиб, автомобилни пойга трассасига қайтариш учун 466 минг доллар керак.
Изоҳ (0)