Сирдарё вилояти мусиқали драма театри актёри Адҳам Абдуллаев вафот этди
Давоми: Гулистонлик Ўзбекистонда хизмат кўрсатган артист коронавирус оқибатида вафот этгани маълум бўлди
Адҳам Абдуллаев 1953 йил Тошкент вилоятида туғилган. Маълумоти олий. 2002 йилда «Ўзбекистон Республикасида хизмат кўрсатган артист» унвони билан мукофотланган.
Адҳам Абдуллаев 1975 йил Сирдарё вилоят мусиқали драма театрида ўз ижодий фаолиятини бошлаган. Ижодкор ўтган йиллар мобайнида 130 дан зиёд драматик, трагик, ҳажвий, мусиқий ҳамда эртак қаҳрамонларининг бетакрор образларини яратган.
«Сўнгги фожиа»да Шавкат, «Серғайрат кишилар»да Соддадил, «Ричард III»да Лорд Хестингес, «Ҳаммом»да Белвидонский, «Қизбулоқ»да Гунг, «Имзо»да Леонид Шиндин, «Сохта оқсуяк»да Рақс муаллими, «Чорбоғдаги ҳангомалар»да Ломов Иван Василевич, «Алишер Навоий»да Мажидиддин, «Оддий аскарлар»да Капитан Дугин, «Ҳийлайи шаърий»да Шариф, «Чандунинг саргузашлари»да Кеку Баня, «Қирол Лир»да Герцог Альбани роллари шулар жумласидандир.
Театршунос, журналист сифатида «Сирдарё вилояти театри тарихи, актёр ва режиссёрлари фаолиятига оид ёзган ўнлаб илмий мақолалари республика ва вилоят газета ҳамда журналларида чоп этилган.
