Коронавирус профилактикасида Эргоферон ва шунга ўхшаш дори воситаларини ўзбошимчалик билан қабул қилиш мақсадга мувофиқ эмас. Бу ҳақда Санитария-эпидемиология назорати давлат инспекцияси бош инспектори Нурмат Отабеков АОКА ҳузуридаги штабда ташкил этилган брифингда гапириб ўтди.
Уй шароитида коронавирус касаллигини даволаш бевосита ҳудудий поликлиникалар ва шифокорлар назорати остида амалга оширилиши, бирор бир даволаш чорасини тиббиёт ходимларининг маслаҳатисиз қилиш керак эмаслиги таъкидланди. Тиббиёт ходимлари беморнинг аҳволи, касаллик кечиши, ёндош касалликлар мавжудлигидан келиб чиқиб тегишли тавсиялар беради.
«Айни пайтда Соғлиқни сақлаш вазирлиги ҳамда Санитария-эпидемиологик осойишталик агентлиги томонидан уйда даволаниш бўйича тартиб ишлаб чиқилган, унга мувофиқ «Азитромицин», «Плаквенил», «Лопиавир/Ритонавир», «Ремдесивир», «Умифеновир», «Фавипиравир» каби дорилар тавсия этиляпти. Бу дориларнинг барчаси профилактика, касалликнинг юқишини олдини олиш мақсадида ишлатиш мумкинлиги айтиляпти. Лекин ҳар қандай ҳолатда ҳам аҳоли ушбу дориларни мустақил эмас, балки тиббиёт ходимларининг тавсиясига асосан олиб қабул қилиш маслаҳат берилади», — дейди Отабеков.Аҳоли ўз иммун тизимини барқарор ушлаб туриш учун бўлган имкониятларини ишга солиши энг асосий қиладиган иш сифатида тавсия этилди.
Эслатиб ўтамиз, аввалроқ Ўзбекистонда коронавируснинг аломатсиз шакли билан касалланганларни уй шароитида даволаш тартиби белгиланган, Соғлиқни сақлаш вазирлиги уй шароитида коронавируснинг аломатсиз шакли билан тиббий кузатув ва даволашга олинган беморлар учун эслатма билан чиққан, коронавирусга қарши кураш штаби аъзоси Ҳабибулла Оқилов ҳам коронавирусни уй шароитида даволаш шартлари, ичилиши мумкин бўлган дори турларини маълум қилган эди.
Мавзуга доир:
- «Ҳаммамиз жиловни қўйиб юбордик» — Шавкат Мирзиёев мамлакатдаги коронавирус билан боғлиқ вазият ҳақида
- «Ўзбекистон соғлиқни сақлаш тизимидаги ресурслар поёнига етди, деса муболаға бўлмайди. Бўш койка-ўринлар қолмади» — Ҳабибулла Оқилов
- Ўзбекистонда 5 июлдан бошлаб коронавирусга чалинган айрим тоифа беморлар ўз уйида даволаниши мумкин бўлади
Изоҳ (0)