Футзал бўйича Ўзбекистон чемпионати учрашувлари коронавирус туфайли жорий қилинган янги чекловлар сабаб номаълум муддатга қолдирилди.
Республика махсус комиссияси қарорига кўра, Ўзбекистонда 10 июлдан 1 августга қадар бир қатор карантин чекловлари жорий этилди. Улар орасида спорт заллари фаолиятини чеклашга доир банд ҳам бўлиб, айнан шу сабаб футзал чемпионати ўйинлари тўхтатилган.
Шунингдек, ПФЛ футбол бўйича Биринчи Лига мавсумини ҳам вақтинча тўхтатишга қарор қилди. 9 июль куни лига клублари вакиллари иштирокида видеоконференция бўлиб ўтди.
«Биринчи Лига мусобақасида иштирок этувчи клубларнинг молиявий имконияти юқори лигалар жамоалариникидан фарқ қилади. Биринчи Лига жамоалари бошқа вилоятлардаги ўйинларга кўп ҳолатларда ўйин куни бориб қайтади ва асосан йўналишсиз такси хизматидан фойдалади. Айни ҳолатда эса вилоятлар орасида транспорт воситаларининг ҳаракати чекланди. Рухсат этилган бошқа транспорт воситаларидан фойдаланиш, меҳмонхоналар ва бошқа харажатлар эса табиийки, лига клубларига қийинчилик туғдиради.
Видеоконференцияда юқоридаги каби омилларни ҳисобга олган ҳолда, Биринчи Лига мусобақаларини карантин чоралари юмшатилгунига қадар вақтинча тўхтатиб туриш мақсадга мувофиқ деб топилди. Футбол клублари эса рухсат этилган вақтларда машғулотларни давом эттиради», — дейилади ташкилот баёнотида.
Мавзуга доир: Тошкентнинг «Локомотив» футбол клуби аёллар жамоаси карантинга олинди
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)