YouTube’даги «Русская Жимхана» канали видеоблогерлари 2019 йилдан буён автомобилда орқамача сальто отишга уриниб келади. Бу сафар ҳам сальто учун махсус қурилган «рампа» ва қайта ишланган «Запорожец»дан фойдаланилди.
Март ойида омадсиз уриниш амалга оширилган эди ва шундан сўнг автомобиль таъмирлашга юборилган. Натижада ушбу трюкни бажариш ёз фаслига қолиб кетган.
Навбатдаги уринишда блогерлар автомобиль ёрдамида тўлиқ салтони амалга оширишга муваффақ бўлган ва машина тўрт ғилдирак билан ерга «қўнган». Таъкидланишича, бу Россияда автомобиль ёрдамида бажарилган биринчи сальто ҳисобланади.
Бунда автомобиль айланиши учун керакли тезликни бериш мақсадида қурилган махсус «рампа» муҳим роль ўйнаган. У нафақат автомобилнинг юқорига чиқишига ёрдам берган, балки олд қисмининг орқасига нисбатан айланишига хизмат қилган.
Видеоролик орқали омадсиз уринишлар ва муваффақиятли амалга оширилган сальтони турли ракурслардан томоша қилиш мумкин.
Изоҳ (0)