Шавкат Мирзиёев хорижда қолган барча ўзбекистонликлар олиб келинишини маълум қилди

Ўзбекистон Президенти Шавкат Мирзиёев раислигида 8 июль, чоршанба куни ўтказилган видеоселектор йиғилишида ҳудудларда тадбиркорликни ривожлантириш ҳамда бюджет тушумларини сўзсиз таъминлаш чора-тадбирлари муҳокама қилинди. Бу ҳақда Президент матбуот хизмати хабар берди.

Йиғилишда Президент мамлакатдаги коронавирус билан боғлиқ вазиятга тўхталиб ўтди.

Давлат раҳбарининг маълум қилишича, шу пайтга қадар хорижий давлатлардан 90 мингдан ортиқ фуқаро олиб келинган.

«Яна бир марта халқимизга мурожаат қилиб айтмоқчиманки, чет элдаги қолган фуқароларимизни, албатта, олиб келамиз», — деди Шавкат Мирзиёев.

Шунингдек, Россия—Қозоғистон чегарасида тўпланган фуқароларни тизимли равишда, тартиб билан олиб келиш бўйича топшириқ берилган.

Президент касалланганлар сони кўпайиб кетгани сабабли 10 июлдан 1 августгача карантин чоралари кучайтирилиши ҳақида қарор қабул қилинганини таъкидлаб ўтди.

Давлат раҳбарининг қайд этишича, касалланганлар сони шу тарзда ошиб бораверса, Тошкент шаҳрида ҳам, вилоятларда ҳам шифохоналар касалларни қабул қила олмай қолиши мумкин.

Эслатиб ўтамиз, Ўзбекистонда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинади. 10 июлдан тўйлар, оилавий ва оммавий тадбирлар тақиқланади, автотранспорт ҳаракати чекланади, буюм бозорлари ва болалар боғчалари ёпилади, халқаро авиақатновлар икки бараварга қисқартирилади, коронавирусдан уй шароитида даволанаётганларга тиббий ёрдам бериш учун мобил гуруҳлар ташкил этилади, Ўзбекистоннинг барча ҳудудлари эпидемиологик тоифаси «қизил» бўлади.