Коронавирус кириб келиши ва тарқалишининг олдини олишни мувофиқлаштирувчи Фарғона вилояти штаби 6 июль, душанба куни вилоятда аниқланган учта ҳолат аҳоли орасида аниқланганини рад этди.

Соғлиқни сақлаш вазирлиги 2020 йил 6 июль соат 17:00 ҳолатига кўра, Фарғона вилоятида аҳоли орасида 3 та касалланиш ҳолати қайд этилганини хабар берганди. Коронавирус бўйича Фарғона вилояти штаби «Дарё»га касаллик аниқланган фуқаролар ҳақида маълумотларни тақдим этди.

«Эпидемиологик суриштирувларга кўра, Тошкент шаҳар фуқароси пойтахтда таҳлил топширган ва жавоби 5 кунда ҳам чиқмагандан сўнг Фарғона вилоятига қараб йўл олган. Фарғонага кириб келганидан сўнг таҳлил натижалари аниқлангач, вилоят Санитария-эпидемиологик осойишталик маркази мутахассислари томонидан шу заҳоти ушбу фуқаро 2 нафар оила аъзоси билан Фарғона вилояти Риштон туманидаги вилоят 2-сонли юқумли касалликлар шифохонасига ётқизилган», — дейилади штаб хабарида.

Яна бир фарғоналик фуқаро Тошкентда ҳарбий қисмда хизмат қилган. У 2020 йилнинг 1 июль куни Тошкент шаҳрида коронавирусга таҳлил топширган. Фуқаро Фарғонага йўлга чиққанидан сўнг телефон орқали касаллик борлигига гумон қилинганлиги тўғрисида хабар қилинган. Ҳолат бўйича масъуллар томонидан чора-тадбирлар белгиланиб, қайта суртма таҳлили олинган ва фуқаро вилоят 2-сонли юқумли касалликлар шифохонасига ётқизилган.

Коронавирусга чалинган учинчи бемор Фарғона вилоятида ишловчи самарқандлик фуқаро бўлиб, у Самарқандда меҳнат таътилида бўлган. Икки кун аввал Фарғонага ишга қайтганлиги сабабли лаборатор таҳлил асосида тест топширган. Унда ҳам коронавирус инфекцияси аниқлангач, оила аъзолари билан биргаликда вилоят 2-сонли юқумли касалликлар шифохонасига ётқизилган.

«Эпидемиологик суриштирувлар натижасида коронавирус инфекцияси фуқароларга Тошкент шаҳрида ҳамда Самарқанд вилоятида юққан деган хулосага келинди. Ҳозирда касаллик манбасини аниқлаш юзасидан эпидемиологик суриштирув ишлари давом эттирилмоқда», — дейилади Фарғона вилояти штаби хабарида.

Соғлиқни сақлаш вазирлиги хабарлари бошқа расмий манбалар хабарларидан фарқ қилиш ҳолатлари илгари ҳам кузатилган. Мисол учун, Сурхондарё вилоятининг Денов тумани ҳокими Бахтиёр Ибатов 21 июнь куни туман аҳолисига қилган мурожаатида туман фуқароси 20 июнь куни касалликдан вафот этганини маълум қилган. ССВ вакили дастлаб бу маълумотларни тасдиқламаган. Аммо беморнинг ўлимидан 5 кун ўтиб вазирлик марҳумдан олинган намуналарда касаллик тасдиқланганини хабар берганди.

Шунингдек, Қашқадарё вилоятининг Китоб туманида вафот этган фуқаронинг коронавирусга чалинганини ССВ рад этган. Бироқ туман ҳокимлиги касалликнинг оғир аломатлари туфайли вафот этган бемор билан мулоқотда бўлган яқинлари ва тиббиёт ходимларида коронавирус аниқланганини хабар қилган. Вазирлик коронавирусдан вафот этган беморлар сонига на ўзгариш киритди ва на бу ҳолатга изоҳ берди.

6 июль куни Навоий вилояти ҳокими Қобул Турсунов вилоят аҳолисига қилган мурожаатида вилоят ҳудудида биринчи ўлим ҳолати қайд этилганини маълум қилди. Кейинроқ ҳокимлик бу маълумотни расман эълон қилиб, бемор ҳақида қўшимча маълумотлар тақдим этди. Орадан бир неча соат ўтган бўлса-да, Соғлиқни сақлаш вазирлиги Навоийда кузатилган ўлим ҳолати ҳақида ахборот бермади.