Сурхондарё вилояти Қизириқ туманида Malibu ҳамда «ВАЗ-2101»(«Жигули») иштирокида даҳшатли йўл транспорт ҳодисаси юз берди. Бу ҳақда ИИВ ҳузуридаги Тергов департаменти хабар қилган.

Унга кўра 2020 йилнинг 29 июнь куни соат 23:30 да 31 ёшли ҳайдовчи З.Т. бошқарувидаги Malibu Қизириқ тумани «Зарбдор» маҳалласи ҳудудидан ўтувчи 4Р 100 автомобиль йўлининг 81-километрида Бандихон—Қизириқ тумани йўналишида ҳаракатланиб, қарама-қарши йўналишдан келаётган 56 ёшли Ў.Х.нинг «ВАЗ-2101» машинасининг йўлига чиқиб кетиши оқибатида йўл транспорт ҳодисаси содир бўлган.

Оқибатда «ВАЗ-2101» машинасида ёнғин чиқиб, ҳайдовчи Ў.Х. ва олд ўриндиғида йўловчи сифатида кетаётган 50 ёшли А.Ж. автомобиль салонида қолиб кетиб, ҳодиса жойида вафот этган.

Мазкур ҳолат юзасидан Қизириқ туман ИИБ ҳузуридаги тергов гуруҳи томонидан Ўзбекистон Республикаси Жиноят кодексининг 266-моддаси 3-қисми «а» банди (Одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда тергов ҳаракатлари олиб борилмоқда.