Германия канцлери Ангела Меркель нарса харид қилиш учун дўконга борганда ниқоб тақади. Лекин ижтимоий масофани сақлаб турганда унга эҳтиёж сезмайди. Бу ҳақда у Франция президенти Эммануэль Макрон билан биргаликда ўтказилган қўшма матбуот анжуманида айтиб ўтди, деб хабар беради Die Welt.
«Агар ижтимоий масофаланишга амал қилсам, ниқоб тақишга ҳожат йўқ. Аммо дўконга нарса харид қилиш учун борадиган бўлсам, унда мени ниқобда кўришингиз мумкин», – дейди Меркель.
Март ойининг охирида пневмонияга қарши вакцина синови ўтказган шифокорда коронавирус аниқлангандан сўнг Меркель ўзини ўзи яккалаш режимига ўтган эди. Шу билан бирга, канцлер уйдан ишлашни давом эттирди ва ҳукумат мажлисларида видеоконференциялар орқали қатнашди.
Коронавирус инфекцияси бўйича бир нечта тестлар манфий натижани кўрсатгандан сўнг канцлер офисга қайтиб келди.
Март ойида Меркель Германиянинг 70 фоиз аҳолиси коронавирус юқтириб олиши мумкинлигини маълум қилган эди.
Жонс Ҳопкинс университетининг берган маълумотига кўра Германияда коронавирус билан боғлиқ 195 042 та ҳолат аниқланган. Беморларнинг 177 770 нафари соғайган, 8 976 нафари эса вафот этган.
Изоҳ (0)