«Манчестер Юнайтед» ҳужумчиси Маркус Рэшфорд коронавирус пандемияси пайтида муҳтож оилаларга ёрдам бериш учун маблағ йиғди. Йиғилган пуллар 3 миллион инсонни бир мартадан овқатлантириш учун етарли бўлиши айтилмоқда.

«Болалар, менда ажойиб янгилик бор! Биз олдимизга июнь ойининг охирига келиб, Буюк Британиядаги 3 миллион муҳтож кишини озиқ-овқат билан таъминлашни мақсад қилган эдик. Бугун бунинг учун керакли маблағни тўпладик. Қўллаб-қувватлаганингиз учун барчангизга катта раҳмат.

Ҳозир мен буни нишонлаяпман, лекин ҳали қилинадиган ишлар кўп. Ишонинг, мен Буюк Британияда бирон бир боланинг оч қолишини истамайман ва бунинг учун курашишда давом этаман. Бу 2020 йилги Англия, оилалар эса ёрдамга муҳтож», — деб ёзиб қолдирган Рэшфорд Twitter’даги саҳифасида.

Маркус Рэшфорд «Манчестер Юнайтед» тарбияланувчиси ҳисобланади. У 2016 йилдан бери «қизил иблислар»нинг асосий жамоасида тўп суриб келади. Англия чемпионатининг жорий мавсумда у 22 ўйинда майдонга тушиб, ўз ҳисобига 14 та гол ва 5 та ассист ёздириб қўйди.