Mercer консалтинг гуруҳи томонидан хорижлик мутахассислар яшаши учун энг қиммат шаҳарлар рейтинги эълон қилинди, рўйхатни уч йилдан бери Гонконг бошқармоқда.

Фото: «Дарё»

Гонконг 2019 йилдан бери давом этиб келаётган норозилик намойишларига, АҚШ доллари курсининг тебранишлари ва шаҳарда яшаш нархлари кўтарилганига қарамай етакчиликни сақлаб қолди. Forbes’нинг қайд этишича, Гонконгнинг рейтингда ўз ўрнида қолишига кўчмас мулк нархларининг баландлиги ҳам таъсир қилган.

Иккинчи поғонани Туркманистон пойтахти Ашхобод шаҳри эгаллаган. Бир йил ичида шаҳар бешта ўринга сакраган. Туркманистонда гиперинфляция билан боғлиқ иқтисодий ва ижтимоий инқироз кузатилмоқда, дейилади Mercer ҳисоботида. Ашхободда импорт маҳсулотлари ва товарлар нархининг кўтарилишига ҳам асосий сабаб ушбу омиллар экани қайд этилган.

Топ-10 рейтингга Гонконг ва Ашхободдан ташқари Осиёдан Токио (3-ўрин), Сингапур (5-ўрин), Шанхай (7-ўрин) ва Пекин (10-ўрин) шаҳарлари ҳам киритилган.

Европанинг энг қиммат шаҳарлари Швейцария давлати ҳудудида жойлашган: Цюрих 4-ўринни, Берн ва Женева эса мос равишда 8 ва 9-ўринларни банд этди. Шунингдек, АҚШнинг Нью-Йорк шаҳри ҳам кучли ўнликка кириб, 6-поғонани эгаллаган.

Хорижлик мутахассисларнинг яшаши учун энг арзон шаҳарлар сифатида Тошкент, Бишкек, Намибиядаги Виндхук шаҳри, шунингдек, Тунис эътироф қилинган.

2020 йил март ойида The Economist Intelligence Unit энг арзон ва энг қиммат шаҳарлар рейтингини эълон қилган ва Тошкент рўйхатда 132-ўринда қайд этилиб, энг арзон, яъни яшаш учун зарур нарсалар нархи юқори бўлмаган шаҳарлар ўнлигида қолгани хабар қилинган. Январь ойида дунёнинг энг қиммат шаҳарлари рейтинги эълон қилинган ва Тошкент унда 413-ўринни эгаллаганди. Тошкент 2019 йилнинг ёзида Mercer компанияси ҳисоботига кўра, экспатлар учун энг арзон шаҳар рейтингидаги 1-ўринни Тунисга бўшатиб берган. 2019 йилнинг июль ойида Ўзбекистон Numbeo порталининг яшаш учун энг арзон мамлакатлар рейтингида 6-ўринни эгаллаганди.