Май ойида UFC’ни тарк этишини маълум қилган мутлақ енгил вазн тоифаси собиқ чемпиони Генри Сеҳудо бир шартга кўра промоушенга қайтишга тайёр эканини маълум қилди.
Яккакурашчи австралиялик Александр Волкановскига қарши жанг қилишни истамоқда.
«Мен ўз фаолиятимдан мамнунман. Мени қайтишга мажбур қила оладиган битта жанг бор. Эрталаблари мана шу жанг ҳақидаги ўйлар билан уйғонаман. Александр Волкановскига қарши жангни назарда тутяпман.
Унинг устидан қозонилган ғалаба мени MMA тарихидаги буюк жангчилардан бирига айлантиради», — дейди Сеҳудо.
Сеҳудо 10 май куни Флорида штатида бўлиб ўтган UFC 249 мусобақасида собиқ чемпион Доминик Крузга қарши жанг қилди. Иккинчи раунддаги нокаут эвазига ғалаба қозонган Сеҳудо чемпионлик камарини ҳимоя қилди. Шундан сўнг спортчи фаолиятини тугатишини маълум қилди ва камарни топширди.
Волкановски ярим енгил вазн тоифасида UFC чемпиони ҳисобланади. Аввалроқ Александр UFC 251 мусобақасида Макс Ҳоллуэйга қарши жанг қилиши маълум бўлганди.
Сеҳудо MMA’да 18 жанг ўтказиб, 16 ғалаба ва 2 мағлубият қайд этган. Шунингдек, у эркин кураш бўйича 2008 йилги ёзги Олимпиада ўйинлари чемпиони ҳисобланади.
Изоҳ (0)