Роналду ва Месси пандемия даврида Instagram орқали қанча пул ишлаб топгани маълум бўлди

Коронавирус пандемияси сабабли юзага карантин вақтида спортчиларнинг Instagram’да қанча даромад топгани маълум бўлди, дея ёзади Daily Mail.

Таъкидланишича, ушбу ижтимоий тармоқ 12 мартдан 14 майгача бўлган вақт оралиғида уч футболчи Криштиану Роналду, Лионель Месси ва Неймарни сезиларли даражада бойитган.

Уларнинг ҳар бири икки ой ичида ҳомий ва ҳамкорларнинг 4 тадан реклама постини ўз саҳифасида эълон қилган. 219 миллион обуначиси бўлган Роналду бу орқали 2,1 миллион евро фойда кўрган бўлса, Месси (151 миллион обуначи) 1,45 миллион евро, Неймар эса (138 миллион обуначи) 1,33 миллион евро даромад топган. Шундай қилиб, битта реклама пости Роналдуга ўртача 526 минг евро, Мессига 363 минг евро, Неймарга эса 333 евро даромад келтирган.

Тўртинчи ўриндан 2011 йилда фаолиятини якунлаган афсонавий баскетболчи Шакил O'нилл жой эгаллади. Дастлабки учликка қараганда, унинг обуначилари сони камроқ (17 миллион) ва шунга мос равишда битта реклама постининг нархи 40,8 минг евро. Бироқ Шакил икки ой ичида 16 та шундай пост жойлаб, яхшигина даромад орттириб олган(653 минг евро).

Шунингдек, топ-10 таликдан Дэвид Бекҳэм (453 минг евро), ҳиндистонлик крикет устаси Вират Коҳли (424 минг евро), Златан Ибрагимович (206 минг евро), баскетболчи Дуэйн Вейд (128 минг евро), Дани Алвес (120 минг евро) ва британиялик боксчи Энтони Жошуа (109 минг евро) жой олди.

Таъкидлаш жоизки, улардан ҳеч қайси бири бештадан ортиқ реклама постларини эълон қилмаган.