АҚШда афроамерикалик қиз соч турмаги туфайли битирув кечасига қўйилмаяпти

Американинг Техас штатида яшовчи Кианжене исмли қиз соч турмагини ўзгартирмаса, шаҳодатнома топшириш маросимига қўйилмайди, деб ёзади NBC News.

Мактаб маъмуриятига қизнинг Африка услубида ўрилган узун пуштиранг сочлари ёқмаяпти.

18 ёшли Кианжененинг онаси Киане Хуперга мактаб директори қўнғироқ қилган ҳамда қизи маросим дресс-кодига тўғри келмайдиган соч турмагини ўзгартирмаса, у битирув кечасига қўйилмаслигини айтган.

«Сиз шаҳодатнома бераётган инсонни унинг сочларига қараб баҳолайсизми? Дунёда ҳозирги кунда кузатилаётган аҳволни инобатга олган ҳолда буни аҳмоқлик деб биламан», — дея жавоб берган қизнинг онаси мактаб директорига.

Афроамерикалик қиз сочи рангини ўзгартириш ёки уларни яшириш учун бош кийими кийиш ниятида эмас.