Huawei компанияси Ўзбекистонда интернет орқали кўрсатилган хизматлар ва сотилган маҳсулотлар учун қўшилган қиймат солиғини тўловчи сифатида рўйхатдан ўтди. Бу ҳақда Давлат солиқ қўмитаси маълум қилди.
Хабар берилишича, Гонконгда рўйхатдан ўтган Huawei Services Cо., Limited компанияси 1 июнь куни Ўзбекистонда қўшилган қиймат солиғи тўловчи сифатида рўйхатга олинган.
Шу тариқа, Ўзбекистонда қўшилган қиймат солиғи тўловчиси сифатида рўйхатга олинган хорижий интернет компанияларнинг сони 14 тага етди.
Аввалроқ «Яндекс» Ўзбекистонда «Google солиғи» тўлайдиган компаниялар қаторига қўшилгани ҳақида хабар берилган эди.
Бунга қадар Google, Facebook, Netflix, Samsung, Apple, «Booking.com» ва бошқа компаниялар Ўзбекистонда кўрсатилган рақамли хизматлар учун қўшилган қиймат солиғини тўловчи сифатида рўйхатдан ўтган эди.
Мамлакатда бундай компанияларни рўйхатга олиш учун Давлат солиқ қўмитаси томонидан махсус хизмат — интернет-компанияларнинг ҚҚС-офиси яратилган.
Эслатиб ўтамиз, Ўзбекистон Солиқ кодексининг янгиланган таҳририда «Google солиғи» белгилаб қўйилган. Унга кўра, Ўзбекистон ҳудудида рақамли хизматлар кўрсатадиган хорижий интернет-компаниялар қўшилган қиймат солиғини тўлайди.
Изоҳ (0)