«Барселона» «янги Пирло» учун икки футболчиси ва 65 миллион евро таклиф қилди

Италиянинг «Брешия» клуби президенти Массимо Челлини 20 ёшли ярим ҳимоячи Сандро Тоналига Европанинг турли клублари қизиқаётгани ҳақида гапирди.

«Тоналининг ўз мақсадлари, амбициялари ва оиласи бор, у учун онаси муҳим рол ўйнайди. ПСЖ президенти Сандронинг Парижда ўйнашини хоҳлаяпти. У бугун ҳам менга бу ҳақида хабар жўнатди, аммо Тонали Францияга боришни истамаяпти. У «Интер» ёки «Ювентус»га ўтишни афзал кўради.

Аввалроқ «Наполи» президенти 40 миллион евро таклиф қилганди, ҳозирда эса «Фиорентина» таклиф билан чиқмоқчи. Коронавирус пандемиясидан олдин «Барселона» 65 миллион евро ва ҳар бири 7,5 миллион евролик иккита футболчисини таклиф қилганди, улардан бири қанот ҳимоячиси эди. Ўйлашимча, каталон клуби раҳбарлари ўзларига ёқмаган жавобни олишган, лекин Тоналидан эмас.

Сандро тўпни кўриши билан чақнаб кетадиган бола кабидир. У майдонда ўзига хос ишлар қилади. У қисқа ва узоқ масофаларга берадиган аниқ паслари билан ажралиб туради. Тонали ярим ҳимоянинг исталган нуқтасида ўйнай олади.

Тоналининг инсоний фазилатларига келсак, у жамоа учун ўзини қурбон қиладиганлар тоифасидан. Чемпионат тўхтатилгунига қадар, у мендан жароҳат олганини яширган экан, албатта, бу билан жамоага ёрдам беришни хоҳлаган. Буни билгач эса, биз уни куч билан тўхтатишга мажбур бўлдик», — дейди Челлени.

Сандро Тонали «Брешия» тарбияланувчиси ҳисобланади. У 2017 йилда асосий жамоада дебют қилади. Ўша вақтларда «Брешия» ҳали B Серияда ўйнарди. Италия чемпионатининг жорий мавсумида эса, Тонали 23 та ўйин ўтказиб, битта гол урди ва олтита сариқ карточкани ўз номига расмийлаштириб қўйди.