32 ёшни қарши олган Серхио Агуэронинг АПЛдаги энг чиройли голлари (видео)

Аргентина терма жамоаси ва «Манчестер Сити» клуби ҳужумчиси Серхио Кун Агуэро 2 июнь куни 32 ёшни қарши олди.

Фаолияти давом этаётган бўлса-да, Агуэро аллақачон «Манчестер Сити» афсонасига айланган. Футболчи Аргентинанинг «Индепенденте» клуби тарбияланувчиси ҳисобланади.

Агуэро 2003 йилдан «Индепенденте» асосий жамоасида ҳаракат қила бошлайди. Иқтидор эгаси аргентиналиклар клубида кўп қолиб кетмайди ва 2006 йилда Мадриднинг «Атлетико»си сафига келиб қўшилади. У ерда 2011 йилга қадар тўп сурган форвард кейинчалик АПЛга кўчиб ўтади. «Манчестер Сити»даги илк мавсумидаёқ асосий таркиб футболчисига айланган Агуэро шу вақтга қадар «шаҳарликлар» сафида 368 ўйин ўтказиб, 254 та гол уришга эришди.

Кун Агуэро тўрт бор Премьер Лига чемпионлиги, беш марта Англия Лига Кубоги, уч бора мамлакат Суперкубоги ва бир марта Англия Кубогига эга чиқди. Бир неча бор АПЛда мавсум тўпурари бўлди ва қатор рекордлар қайд этди.

Қуйида аргентиналик юлдузнинг Англия чемпионатидаги энг чиройли ва муҳим голларини томоша қилинг:

2016/17 йилги мавсум | «Вест Бромвич» — «Манчестер Сити» 0:4

10-тур доирасидаги баҳсда Агуэро ва Илкай Гундўғаннинг дубллари «шаҳарликлар»га ғалаба келтирганди. Агуэронинг иккинчи голи эса шунчаки шедеврга айланганди.

2015/16 | «Манчестер Сити» — «Ливерпуль» 1:4

«Сити» мазкур ўйинда йирик ҳисобда мағлуб бўлади, бироқ Агуэронинг чиройли голи манкунианларга оз бўлса-да тасалли берганди.

2011/12 | «Норвич» — «Манчестер Сити» 1:6

Лига тарихидаги энг яхши мавсумлар қаторидан жой олган 2011/12 йилги мавсум якунлаб бораётган бир вақтда «Сити» меҳмонда ҳақиқий спектакл ижро этганди. Аргентиналикларнинг бенефисига айланган учрашувда қаҳрамонимиз дубль қайд этади, унинг ватандоши Карлос Тевес эса ҳет-трикка эришади. Шунингдек, Тевеснинг ушбу голдаги хизматлари ҳам беқиёс.

2018/19 | «Манчестер Сити» — «Челси» 6:0

Маурицио Саррининг «Челси»даги курсисини қимирлатиб қўйган баҳсда Агуэро учта голни ўз ҳисобига ёздириб қўйганди. Унинг мана бу зарбаси олдида Кепа Аррисабалага ҳеч нарса қила олмаганди.

2018/19 | «Манчестер Сити» — «Ливерпуль» 2:1

2019 йилнинг илк учрашувида «Сити» мусобақа жадвалида анча олдинлаб кетган «Ливерпуль»ни мағлуб этади ва чемпионлик пойгасида умидни сақлаб қолади. Ушбу учрашувдан кейин Агуэро жамоадошлари фақат бир марта мағлуб бўлади ва қолган барча ўйинларда ғолиб чиққан ҳолда чемпионликни қўлга киритади. 97 очко тўплаган Юрген Клопп жамоаси эса 1 очко фарқ билан совриндан қуруқ қолади.

2012/13 | «Манчестер Юнайтед» — «Манчестер Сити» 1:2

Серхио дербида «Манчестер Юнайтед» ҳимоясини сочиб ташлаган ҳолда гол уради. 78-дақиқадаги мазкур гол меҳмонларга ғалабани олиб келади.

2014/15 | КPR — «Манчестер Сити» 2:2

Агуэро тўпни ажойиб тарзда ўзига ўнглаб олган ҳолда чиройли гол муаллифига айланганди. Унинг дублига қарамасдан «Манчестер Сити» ушбу баҳсда ғалабани ушлаб қололмаганди.

2015/16 | «Манчестер Сити» — «Челси» 3:0

Серхио Яя Туре билан «девор» усулини қўллаб, лондонликлар ҳимоясини доғла қолдирган ҳолда дарвозанинг пастки бурчагини аниқ нишонга олганди.

2018/19 | «Манчестер Сити» — «Манчестер Юнайтед» 3:1

Бунисида эса Гундўған билан ташкил этилган ажойиб комбинациядан кейин Давид Де Хеа ожиз қолдирилган.

2011/12 | «Манчестер Сити» — КPR 3:2

Юқорида тилга олганимиз АПЛ «Олтин мавсуми»нинг кулминацияси!

Сўнгги тур, икки Манчестер клубларининг очколари тенг, «шаҳарликлар» фақат тўплар нисбати бўйича олдинда. 92-дақиқага қадар 1:2 ҳисобида ортда бораётган «Сити» Эдин Жеконинг голидан сўнг ҳисобни тенглаштиради. 90+4-дақиқада Агуэро, эҳтимол, фаолиятидаги энг муҳим голни уради ва жамоасига чемпионликни олиб келади.