Самарқанднинг Нарпай туманидаги мактаб ўқитувчилари рўза пайтида мактаб ҳожатхоналарини тозалашга жалб қилингани айтилмоқда. Бу ҳақда «Дарё»га маълум қилган мурожаатчилар ҳожатхона тозалаётган ва таъмирлаётган ўқитувчилар расмини ҳам юборган.
Нарпай туманидаги 1-мактабда олиб борилган таъмирлаш ишларидан лавҳа.
Фото: «Дарё»
Таъкидланишича, ҳожатхона таъмирлашга мажбурий тарзда жалб қилинган ўқитувчилар вилоятда карантин бўлишига қарамай, ўз имкониятларидан келиб чиқиб мактабга қатнаган.
Мавзуга доир:
Ҳожатхоналар таъмири қандай кетаётганини аниқлаш мақсадида туман ҳоким ўринбосари Асқар Рустамов бошчилигида ХТБ мудири Мирзоҳид Йўлдошев, туман касаба уюшмаси раҳбари Муҳаммад Жумаевдан иборат гуруҳ ҳар куни мактабларга бориб, ҳолатни ўрганган.
«Дарё»га юборилган ва 2020 йил 22 май куни тасвирга олинган видеодан англашилишича, ушбу гуруҳ тумандаги 32-мактабда бўлганида ХТБ мудири Мирзоҳид Йўлдошев таъмирдан кўнгли тўлмай, мактаб директорини турткилаб ташлаган.
«Мактаб директори ўқитувчилар рўзадорлиги учун жисмоний меҳнатдан қийналаётганини айтган вақтда мудир ‘сен буюрилган ишни қил’ деб директорни туртган», — дейилади таҳририятга қилинган мурожаатда.
Мурожаатчиларнинг айтишича, ушбу мактаб жойлашган Умид қишлоғи «Обод қишлоқ» давлат дастурига тушган бўлса ҳам барча таъмирлаш ишлари шу йўсинда амалга оширилади.
Қолаверса, ҳудуддаги уйлар таъмири ва аҳоли ҳолидан хабар олиш ҳам мактаб директорларига юклатилган. «Ўзининг ёғига ўзини қовуриш дейилади бу», — дейди мурожаатчилар.
Тузатиш: Хабарнинг дастлабки таҳрири «Самарқанд вилоятининг Нарпай тумани ҳокими рўзадор ўқитувчиларни ҳожатхона тозалашга жалб қилгани айтилмоқда» сарлавҳаси остида эълон қилинган эди. Бироқ кейинроқ топшириқ туман ҳокими номидан туман ХТБ мудири томонидан берилгани таъкидланди, бунда аудиодалил тақдим этилди. Берилган ноаниқ ахборот учун узр сўраймиз.
