Испанияда хорижлик сайёҳлар учун мажбурий бўлган карантин талаби 1 июлдан бекор қилинади

Испания ҳукумати 1 июлдан бошлаб хорижлик сайёҳлар учун 14 кунлик карантинни бекор қилиш тўғрисида қарор қабул қилди. Бу ҳақда «РИА Новости» хабар берди.

Испания ҳукумати томонидан маълум қилинишича, мазкур қарор 25 май куни бўлиб ўтган вазирликлараро йиғилишда қабул қилинган.

Испания ҳукумати 12 майдан бошлаб хориждан келадиган барча фуқаролар учун 14 кунлик карантинни жорий қилган. Айни пайтда мамлакат чегаралари сайёҳлар учун ёпиқ, авиақатновлар эса чекланган. 23 май куни Испания бош вазири Педро Санчес мамлакат июль ойидан бошлаб сайёҳларни қабул қилишга тайёр бўлишини маълум қилган.

Аввалроқ Чехияда жамоат жойларида ниқобсиз юришга рухсат берилгани, Черногория коронавирусни енгган Европадаги биринчи давлатга айлангани ҳақида хабарлар берилганди.