Видео: 50 йилдан кейин пайдо бўладиган ҳайдовчисиз бошқарилувчи учар автомобиль

Бразилиянинг Embraer авиасозлик корпорацияси 2070 йилларга бориб ишлаб чиқарилиши мумкин бўлган Pulse номли келажак транспортининг футуристик лойиҳасини яратди, деб хабар беради Motor.

Концепт вертикал равишда кўтарилиш ва қўнишга қодир учувчисиз бошқариладиган самолёт, шунингдек, оддий автомобилни ўзида мужассамлаштирган. Уларни ҳеч қандай бошқарув элементлари бўлмаган мустақил йўловчи капсуласи бирлаштириб туради.

Бразилиялик футурологларнинг фикрича, йўловчилар узоқ масофага саёҳатни ҳайдовчисиз автомобилни — ғилдираклар устидаги универсал капсулани чақириш орқали бошлаши мумкин. Аэропортга келгач, капсула ғилдирак шассисидан ажралади ва ичидаги одамлари билан учувчисиз бошқариладиган самолёт билан бирлашади. Белгиланган жойга етиб келгач, у яна ҳаво транспортидан ажралиб, ҳайдовчиси бошқариладиган автомобилга уланади.

Барча конструкция, жумладан, ҳаво ва ердаги шассиларга уланиш механизмлари электр токида ишлайди. Капсула ичидан қулай диван ва креслолар, шунингдек, қўшимча реаллик элементларига эга сенсорли мониторлар ўрин олади. Бу йўловчилар ҳаракат вақтида керакли маълумотлар билан танишишига хизмат қилади.