Халқаро пресс-клубнинг Сардобадаги фалокатга бағишланган сессиясида Бош прокуратура матбуот хизмати бошлиғи Ҳаёт Шамсутдинов Сардоба фожиаси юзасидан қўзғатилган жиноят иши ҳақида маълумот берди.

Кадр: Facebook

Маълумотларга кўра, 1 май куни Сардоба сув омбори ўпирилиши ҳолати юзасидан Жиноят кодексининг 207-модда 1-қисми (Мансабга совуққонлик билан қараш) ва 258-модда 2-қисми «б» банди (Тоғ-кон, қурилиш ёки портлатиш ишлари хавфсизлиги қоидаларини бузиш) билан жиноят иши қўзғатилиб, ҳозирда Давлат хавфсизлик хизмати Тергов бошқармаси томонидан тергов ҳаракатлари олиб борилмоқда.

Сардоба сув омбори ҳукуматнинг 2010 йилги қарори асосида Сардоба, Мирзаобод ва Ховос туманлари ҳудудида барпо этилган бўлиб, умумий сиғими 974 миллион куб метр (фойдаланиш ҳажми — 922 миллион куб метр)ни ташкил қилади. Тўғоннинг максимал баландлиги 33 метрга тенг.

Сардобадаги объект буюртмачиси — «Сирдарё қурилиш инвест» ДУК. Бу собиқ Сув хўжалиги вазирлиги ҳузуридаги 15-сонли қурилаётган объектлар бирлашган дирекцияси бўла туриб, бош пудратчи сифатида «Ўзбекистон темир йўллари» АЖга қарашли «Ўзтемирйўлқурилишмонтаж» УК қатнашган. Қурилиш ишларига 28 та субпудратчи жалб этилган. Лойиҳачи сифатида «УЗГИП» МЧЖ иштирок этган, лойиҳаси қиймати 1,2 триллион сўмни ташкил қилган. Молиялаштириш манбаси бюджет маблағлари ҳисобидан бўлган.

Жиноят иши бўйича Давлат хавфсизлик хизмати ҳамда Ички ишлар вазирлигининг малакали ва тажрибали ходимларидан иборат тезкор-тергов гуруҳи ташкил қилинган. Жиноят иши қуйидаги асосий тергов тахминлар бўйича текширилмоқда:

  • лойиҳалашдаги хатоликлар;
  • қурилиш меъёрларига риоя этмаслик;
  • эксплуатация жараёнидаги хатоликлар;
  • табиий офат.

«Тергов тахминларини текшириш мақсадида дастлабки тергов давомида жами 170 нафардан зиёд шахс тергов гуруҳи аъзолари томонидан гувоҳ тариқасида сўроқ қилиниб, сув омборини лойиҳалаштириш, қурилиши ва эксплуатация қилиш жараёнлари тўғрисида кўрсатмалар олинди. Жиноят иши доирасида 10 тадан ортиқ экспертиза ва лаборатория таҳлилий тадқиқотлар тайинланди», — дейди Ҳаёт Шамсутдинов.

Таъкидланишича, тўғоннинг ҳозирги ҳолатини ўрганиш, сув ва тупроқнинг физик хоссаларини аниқлаш мақсадида тафтиш ва назорат ўлчовлари, қурилишда амалга бажарилган ишлар, фойдаланилган материаллар сифати ва миқдорини аниқлаш учун судга оид қурилиш-техникавий экспертиза тайинланган.

Бундан ташқари, жиноят иши бўйича 25 дан зиёд тегишли идора вакилларидан иборат мутахассислар жалб қилинган бўлиб, ҳозирда тадқиқотлар олиб борилмоқда.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Оқибатда Сардоба тумани Қўрғонтепа аҳоли яшаш пунктига сув кирган. Фавқулодда вазият туфайли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган, ҳодиса оқибатида камида 56 киши турли даражада тан жароҳати олган, тошқин зонасида қолиб кетган юзлаб одамлар қутқарилган, шунингдек, 6 нафар фуқаронинг табиий офат оқибатида ҳалок бўлгани аниқланди.