Ўзбекистонлик миллиардер Алишер Усмонов Сирдарё вилоятининг Сардоба туманидаги тошқин оқибатида жабр кўрган аҳолига кўмак бериш учун 15 миллион АҚШ доллари миқдорида хайрия маблағи ажратгани, ушбу маблағнинг 10 миллион доллари ўзбекистонликларга ёрдам учун, 5 миллиони эса Қозоғистоннинг Туркистон вилояти Мақтараал тумани аҳолиси учун тақдим этилгани хабар берилган эди.
Қозоғистоннинг Туркистон вилояти ҳокимлигининг хабар беришича, жабрланган аҳоли пул маблағлари учун дастлабки сертификатларни олишни бошлади.
Ушбу маблағлар тошқиндан жабрланган оилалар бошлиқларининг жами 5202 та ҳисоб рақамига ўтказиб берилади. Ҳужжатлар тўлиқ шакллантирилгач, ҳар бир оила уларга ажратилган пулни олади.
Алишер Усмонов «Туркистон» ижтимоий ривожланиш жамғармаси ҳисобига жами 5 миллион 202 минг долларни хайрия сифатида ўтказиб берган. Бу маблағлар 30 420 киши ўртасида тақсимланади ёки ҳар бир эвакуация қилинган оилага 442 тенге (1000 доллар) миқдорида берилади.
Эслатиб ўтамиз, Сардоба сув омборидаги сув тошқини оқибатида Қозоғистоннинг Туркистон вилояти Мақтаарал тумани ҳудудида техноген хусусиятга эга фавқулодда ҳолат эълон қилинган, вилоят ҳудудида 30 мингдан ортиқ одам эвакуация қилинганди. Қозоғистон президени Қосим-Жўмарт Тўқаев тошқиндан жабр кўрган Мақтаарал тумани аҳолиси янги ёки таъмирланган уй жой билан тўлиқ таъминланиши, уларнинг ҳар бирига республика бюджетидан 100 минг тенге берилишини маълум қилганди.
Изоҳ (0)