Аделнинг шахсий тренери, хонанда 45 кг вазн ташлаши сабабини маълум қилди. Бу ҳақида Starhit нашри хабар берди.
Истеъдодли ва ўзига хос услуби билан мухлислар қалбидан жой олган қўшиқчи, ташқи кўринишидаги ижобий ўзгариш билан миллионлаб аёллар учун намуна бўлди.
У авваллари ҳам спорт билан шуғулланган, лекин турмуш ўртоғи Саймон Конекки билан ажрашганидан кейин, асосий вақтини спорт залда ўтказа бошлаган. Спорт билан шуғулланиш, Аделнинг ташқи кўринишида ўз аксини кўрсатмай қолмади: хонанда 45 килограмм озиб янада жозибалироқ кўринишга эга бўлди.
Аделнинг шахсий тренери Пит Жерасимонинг айтишича, Адель ҳеч ҳам ташқи кўринишидан уялмаган.
«У ҳеч қачон ташқи кўринишига эътибор қаратиб, альбомлар сотувини ортиришга ва бошқалардек бўлишга уринмаган. Биз Адель билан бошлаган машғулотлар туғруқдан кейинги саломатликни яхшилашга қаратилганди, концерт сафарлари ва оғир жадвалга тайёргарлик кўришимиз керак эди. Аста-секин у машғулотларга кўникди ва овқатланишига эътиборли бўла бошлади», — дейди Пит.
Саймон билан ҳаммаси тугаганидан кейин аввалига депрессияга тушган Адель, тез орада ўзини қўлга олди ва мукаммал қомат учун ҳаракат қила бошлади. Натижада бир неча ой ўтар ўтмас, сезиларли даражада вазн ташлади.
«Шахсий ҳаётдаги ўзгаришлар янги қарашлар пайдо бўлишига сабабчи бўлиши табиий. Адель тўғри овқатланишга риоя қилиб, ташқи кўриниши устида ишлай бошлади. Мен у учун хурсандман ва у билан фахрланаман», — дейди тренер.
Тренернинг қўшимча қилишича, ушбу ўзгариш ўз-ўзини реклама қилиш ёки кимгадир тақлид эмас, Адель ҳаммасини ўзи ва ўғли Анжело учун амалга оширяпти.
Изоҳ (0)