Ҳозирда АҚШ Ҳормуз бўғози орқали кемалар қатновини тиклаш бўйича операция ўтказмоқда. Адмирал 8 апрелда бошланган ўт очишни тўхтатиш режими ҳали ҳам амалдами ёки йўқми, деган саволга изоҳ бермади. Бироқ у бунга Ислом инқилоби қўриқчилари корпуси (ИИҚК) халақит бераётганини тан олди.
Бред Купернинг сўзларига кўра, Эрон кучлари президент Дональд Трампнинг савдо йўлини очиш бўйича операциясига тўсқинлик қилишга уринмоқда.
“ИИҚК биз ҳимоя қилаётган кемаларга кўплаб қанотли ракеталар, дронлар ва катерлар билан ҳужум қилди. Биз мудофаа қуролларини аниқ қўллаш орқали ушбу таҳдидларнинг барчасини бартараф этдик”, деди адмирал.
Купер Эрон кучларини АҚШ ҳарбий объектларидан узоқроқ туриш ҳақида қатъий огоҳлантирди. Унинг айтишича, операцияга қуйидаги кучлар жалб қилинган:
15 минг нафар америкалик ҳарбий хизматчи;
АҚШ Ҳарбий-денгиз кучларининг эсминецлари;
юздан ортиқ қуруқлик ва денгизда жойлашган самолётлар;
сувости техникалари.
Адмиралнинг таъкидлашича, ҳудуддаги барча қўмондонлар ўз бўлинмаларини ва тижорат кемаларини ҳимоя қилиш учун барча зарур ваколатларга эга.
Янгича мудофаа тизими
АҚШ ҳарбийлари кемаларни анъанавий тарзда кузатиб бормаяпти. Бунинг ўрнига кўп қатламли мудофаа тизими йўлга қўйилган. Ушбу тизим кемалар, вертолётлар, самолётлар ва радиоэлектрон кураш воситаларини ўз ичига олади.
“Агар кема шунчаки кузатиб борилса, бу яккама-якка ўйинга ўхшаб қолади. Бизда эса анча яхши ва кенг қамровли мудофаа тизими мавжуд”, дея тушунтирди Купер.
Шунингдек, Бред Купер Эронга қўйилган блокада ҳали ҳам амалда эканини айтди. Ушбу блокада кемаларнинг Эронга кириши ва у ердан чиқишини тақиқлайди. Адмиралнинг сўзларига кўра, блокада кутилганидан ҳам самаралироқ натижа бермоқда.
Яқин Шарқда вазият яна кескинлашди: БАА порти ва АҚШ кемаларига ҳужум қилинди
Яқин Шарқда Эрон атрофидаги уруш доирасида ҳарбий ҳаракатлар яна авж олди. Бирлашган Араб Амирликларининг (БАА) стратегик муҳим Фужайра нефть порти ва бир нечта АҚШ кемаларига зарбалар берилди.
Эронга нисбатан қатъий чоралар кўришни ёқлаб келаётган БАА хавф ҳақида огоҳлантириш берди. Тасдиқланган маълумотларга кўра, дрон ҳужуми оқибатида Фужайра нефть марказида ёнғин чиққан.
БАА ташқи ишлар вазирлиги ҳолат юзасидан баёнот бериб, Эроннинг янги ҳужумларини “хавфли эскалация” ва “қабул қилиб бўлмас тажовуз” деб баҳолади. Вазирлик агрессияга жавоб бериш ҳуқуқини борлигини билдирди.
