Россияда охирги бир сутка ичида COVID-19 коронавирус инфекцияси оқибатида 98 киши вафот этган. Ушбу оралиқда 1723 нафар одамда касаллик борлиги аниқланган. Бу ҳақда тезкор штаб маълумотига таяниб «РБК» хабар қилди.
Москва шаҳрининг ўзида бир сутка давомида 51 киши COVID-19 коронавируси келтириб чиқарган касаллик оқибатида ҳаётдан кўз юмди. Эпидемия бошланганидан бери Россия пойтахтида 956 нафар бемор коронавирус оқибатида вафот этган. Москва вилоятида 175 нафар (бир сутка ичида 19 та янги ҳолат кузатилди), Санкт-Петербургда 48 нафар (бир сутка ичида 4 та янги ҳолат) одам касаллик қурбонига айланган. Ингушетия Республикаси, Нижегород вилояти ҳамда Краснодар ўлкасида ҳам 20 тадан кўп ўлим ҳолати кузатилган.
Россияда эпидемия бошланганидан бери 26,6 минг киши коронавирусдан тузалган. Охирги бир сутка ичида соғайганлар сафи 2805 тага кўпайган. Россия коронавирусга чалинганлар сони бўйича дунёда бешинчи ўринга чиқиб олган.
Мавзуга доир: Россияда коронавирус касаллиги аёлларга нисбатан эркакларда оғирроқ ўтаётгани маълум қилинди
«Коронавирус борлигини аниқлашда ўсиш кузатилиши касалланиш ҳолатлари кескин ортганлигини англатмайди», — дея Россия президенти Владимир Путинга ҳисобот берган Москва мэри Сергей Собянин.
Собянин Москвадаги ҳаёт пандемиядан аввали даражага қайтиши қисқа фурсатда содир бўлмаслигини таъкидлаган. Шаҳар маъмурияти «ўзни яккалаш» тартибини 31 майга қадар узайтирган, шунингдек, пойтахт аҳолисидан 12 майгача тиббиёт ниқоблари ҳамда қўлқопларини тақиш тартибига амал қилишни сўраган. Ушбу қоидага амал қилмаган фуқарога 4-5 минг рубль (тахминан, 550-690 минг сўм) миқдорида жарима солинади.
Изоҳ (0)