Михаил Саакашвилининг Украинада Ислоҳотлар миллий кенгашининг ижроия қўмитасига раҳбар этиб тайинланганидан кейин Грузия Киевдаги ўз элчисини чақириб олишга қарор қилди. Бу ҳақда Грузия ташқи ишлар вазири Давид Залкалиани маълум қилди, деб хабар бермоқда мамлакатнинг 1TV телеканали.
Залкалианининг маълум қилишича, Грузия ҳукумати Украина билан дипломатик муносабатларни узиш имкониятини кўриб чиқмаяпти, бироқ Грузия суд тизими томонидан суд қилинган ва изланаётган шахснинг давлат лавозимига тайинланиши Грузия ҳукуматида саволларни юзага келтирмоқда. Шу сабабли элчи маслаҳатлашувлар ўтказиш учун чақириб олинди.
Грузия ташқи ишлар вазирининг қайд этишича, мамлакат ҳукумати элчининг иштирокида мазкур вазият икки томонлама муносабатларга, турли халқаро ташкилотлардаги ҳамкорликка ва энг асосийси, Европа интеграцияси бўйича биргаликдаги ҳаракатларга салбий таъсир кўрсатмаслиги учун қандай ҳаракатлар зарурлигини аниқлашни режалаштирмоқда.
Украина президенти Владимир Зеленский 7 май куни Грузиянинг собиқ президенти Михаил Саакашвилини президент қошидаги Миллий ислоҳотлар кенгаши таркибига кирувчи Ислоҳотлар ижроия қўмитаси раҳбари этиб тайинлади.
Мазкур тайинловга қадар Грузия ҳукумати Саакашвилига Украина ҳукумати таркибида лавозим бериш икки мамлакат муносабатларида муаммоларни юзага келтириши мумкинлигидан огоҳлантирган. Грузия бош вазири Георгий Гахария 24 апрель куни агар Украина ҳукумати мазкур қарорни қабул қиладиган бўлса, Грузия маслаҳатлашувлар учун Киевдаги элчисини чақириб олишини маълум қилган.
Михаил Саакашвили 2004—2013 йилларда Грузия президенти бўлган. Президентлик сайловидаги мағлубиятдан кейин у мамлакатни тарк этган ва Украинага келган. Грузияда Саакашвили мансабни суиистеъмол қилганликда ва сиёсий рақибларни таъқиб қилганликда айбланади.
Дастлаб Украина президенти Владимир Зеленский Саакашвилини ислоҳотлар бўйича бош вазир ўринбосари лавозимига тайинлашни кўзлаган эди. Саакашвилининг сўзларига кўра, бу лавозимда унинг ваколатлари қаторига Халқаро валюта жамғармаси билан музокаралар олиб бориш ҳам кириши керак бўлган.
Бироқ Украина Олий радаси депутатлари Саакашвилининг бош вазир ўринбосари лавозимига тайинланишини қўллаб-қувватламади. Дастлабки муҳокамалар чоғида Украина ҳукумати Саакашвилини қўллаб-қувватлаш учун етарлича овоз тўплай олмаган ва унинг номзодини овозга қўйишдан олдин қайтариб олган. Кейинроқ Зеленский Саакашвили билан ишнинг бошқа форматини муҳокама қилгани маълум бўлган.
Украинанинг Ислоҳотлар миллий кенгаши мамлакат президенти ҳузуридаги консультатив орган сифатида фаолият олиб боради. Кенгаш мамлакатнинг собиқ президенти Пётр Порошенко томонидан тузилган. Зеленский даврида кенгашнинг бирорта ҳам йиғилиши ўтказилмаган.
Изоҳ (0)