Асалҳонейни уриб, танасини скотчлаб кетишди. Уни ички ишлар ходимлари қутқарди
Интернетда Асалҳоней номи билан танилган Х.М. исмли аёл 5 май оқшомида ўзи яшайдиган уйда бир эркакнинг ҳужумига учраган. Бу ҳақда Ички ишлар вазирлиги матбуот хизмати хабар бермоқда.
Хабар беришларича, 5 май куни соат тахминан 20:15 да Мирзо Улуғбек тумани 2-сонли ИИБнинг навбатчилик қисмига фуқаро Д.П. мурожаат қилиб, Мирзо Улуғбек тумани Марказ-1 мавзесида яшовчи, интернетда Асалҳоней номи билан танилган аёлнинг хонадонидан шубҳали шовқин-суронли овозлар эшитилаётганлиги ҳақида хабар берган.
Юқоридаги ҳолат юзасидан зудлик билан воқеа жойига етиб борган Тошкент шаҳар ИИББ ППХ бригадаси 1-батальон 1-отряди ходимлари — сафдор Ш.Тоҳиров ва С.Камолов жабрланган фуқаро яшовчи уйнинг кириш-чиқиш йўлагидан югуриб чиқиб, ходимларни кўриб воқеа жойидан яширинишга ҳаракат қилган шахсни ушлаган.
Туман 2-сонли ИИБ Жиноят қидирув бўлимида гумон қилинувчининг шахсига ойдинлик киритилганда, у Тошкент шаҳар Учтепа тумани Пешқадам кўчасида яшовчи Я.А. эканлиги, муқаддам Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноий жавобгарликка тортилганлиги аниқланган.
«Ходимлар юқорида кўрсатилган манзил бўйича уйга киришганда, у ерда яшовчи Х.М. (интернетда Асалҳоней номи билан танилган аёлнинг ҳақиқий исм-шарифи бош ҳарфлари) оғзи, қўли ва оёқлари скотч билан боғланган ҳолда танаси ва юзидаги турли жароҳатлар билан топилган ва биринчи тиббий ёрдам кўрсатилган. Ҳозирда мазкур ҳолат юзасидан тегишли ҳужжатлар расмийлаштирилиб, суриштирув ишлари олиб борилмоқда», — дея хабар бермоқда ИИВ.
Фуқаро Х.М.нинг ўзи ижтимоий тармоқлардаги саҳифаларида юз берган воқеа юзасидан видеохабар қолдирган. Унинг таъкидлашича, гумон қилинувчи ижтимоий тармоқда жабрланувчининг катта миқдордаги пул билан тушганини тасвирларини кўриб, шу пулларга эга бўлиш мақсадида унинг уйига келган ва аёлга ҳужум қилган.
