Андижон ҳокимлиги сартарошхона ва таксилар фаолияти тиклангани ҳақидаги хабарларни рад этди

Андижон ҳокимлиги вилоятда йўловчи ташишга рухсат берилгани, гўзаллик салони ҳамда меҳмонхоналар фаолияти тиклангани ҳақидаги хабарни рад этди.

Гап шундаки, Андижон вилоят ҳокимлиги 2020 йил 4 май куни «Андижонда бир қанча йўналишларга фаолият олиб бориш учун рухсат берилди», деб расмий хабар тарқатди. Мазкур хабарга кўра, «Дарё» Андижонда йўловчи ташишга рухсат берилиб, гўзаллик салони ҳамда меҳмонхоналар фаолияти тикланганини хабар қилди.

Андижон вилоят ҳокимлиги 5 май куни мазкур хабарга расмий муносабат билдириб, «...ушбу хабар орқали Андижон вилояти ҳокимлиги томонидан маиший хизмат кўрсатиш шохобчалари, сартарошхоналар, меҳмонхоналар ва таксилар фаолиятини тиклаш жараёнларига босқичма-босқич тайёргарлик кўриш назарда тутилган», — дея изоҳлаган.

Ҳокимлик муносабати сўнгида «Республика бўйлаб маиший хизмат кўрсатиш шохобчалари, сартарошхоналар, меҳмонхоналар ҳамда таксилар фаолиятини тўлиқ йўлга қўйиш республика махсус комиссияси қарорига асосан амалга оширилишини маълум қиламиз», дея хабар мазмунини инкор этиб, дастлабки хабарини расмий каналидан ўчириб юборган.