Тошкентда жойлашган Республика шошилинч тиббий ёрдам илмий марказига 15 апрель куни бош мия қон айланишининг ўткир бузилиши (инсульт) билан 1959 йилда туғилган Г. исмли бемор ётқизилган. Ўтказилган диагностик таҳлиллардан сўнг беморда COVID-19 коронавирус инфекцияси аниқланган. Шундан сўнг бемор ихтисослашган тиббий ёрдам бериш мақсадида Тошкент тиббиёт академиясининг кўп тармоқли клиникасига оғир ҳолатда ўтказилган.
«Беморда бош мия қон айланишининг ўткир бузилиши, ўпканинг сурункали обструктив касаллиги, икки томонлама бронхопневмония, ўткир буйрак етишмовчилиги, гипертония каби қатор хасталиклар бўлганлиги сабабли даволаниш оғир кечиб, 14 кун сунъий нафас олдириш аппаратида бўлган. Бундан аввал, яъни 2 февралда у илк бор бош мия қон айланишининг ўткир бузилиши ( инсульт) ташхиси билан Республика шошилинч тиббий ёрдам илмий марказига ётқизилган ва даволаниб чиққан», — дейилади Соғлиқни сақлаш вазирлиги хабарида.
Маълум қилинишича, 61 ёшли бемор даволаниш давомида кунлик аҳволи видеомулоқотлар орқали хорижлик ва ўзбекистонлик мутахассислар назоратида бўлган. Улар томонидан мунтазам консилиумлар ўтказиб келинган.
Бироқ мутахассисларнинг белгиланган стандартлар асосида ўтказган реанимацион муолажаларига қарамасдан бемор ўткир респиратор дистресс синдром, ўткир нафас етишмовчилиги, ўпка-юрак етишмовчилигидан вафот этди.
Бу Ўзбекистонда коронавирусга чалинган беморнинг вафот этиши билан боғлиқ тўққизинчи ҳолатдир. Бунгача
- 27 март куни Наманган вилоятида Умрадан қайтган қизидан коронавирус юқтириб олган 72 ёшли онахон миокард инфарктидан (унинг жанозасида қариндошларидан ҳеч ким иштирок этмаган);
- 28 март куни Тошкент шаҳрида ўзини уйда даволашга уринган 39 ёшли (эркак) шифокор коронавирус инфекциясидан;
- 7 апрель куни коронавирусга чалинган 40 ёшли эркак юрак ва ўпка етишмовчилигидан;
- 11 апрель куни эса хориж сафаридан коронавирусга чалиниб қайтган фарғоналик 59 ёшли аёл ўткир респиратор дистресс синдром, ўткир нафас етишмовчилиги ҳамда ўпка-юрак етишмовчилиги оқибатида;
- 14 апрель куни Наманган шаҳрида яшовчи 73 ёшли Ш. юрак қон-томир етишмовчилигидан;
- 18 апрель куни Тошкент шаҳрида 77 ёшли аёл коронавирус инфекцияси асоратлари — икки томонлама бронхопневмониянинг оғир кечиши, ўткир нафас етишмовчилиги ва ўпка шишидан;
- 22 апрель куни Наманган шаҳрида яшовчи 54 ёшли бемор (аёл) ўткир нафас ва юрак қон-томир етишмовчилигидан;
- 24 апрель куни Ангренда коронавирус инфекцияси тасдиқланган бемор ўткир нафас, ўпка-юрак ва полиорган етишмовчилигидан
Ўзбекистонда 29 апрель соат 23:00 ҳолатига кўра, коронавирус инфекциясини юқтириб олганлар сони 2002 нафарни ташкил этмоқда. Мамлакатда 15 мартдан буён коронавирусга чалинган беморларнинг 1096 нафари эса соғайган. Хорижда 73 ўзбекистонликда коронавирус аниқланган (энг кўпи — 42 нафари Россияда), уларнинг тўрт нафари вафот этган.
Изоҳ (0)