КХДР давлат радиосининг мамлакат раҳбари Ким Чен Иннинг аҳволи яхшилиги ҳақидаги хабарини унинг касал эканлиги ва ҳатто ўлгани ҳақидаги гап-сўзларга Пхеньяннинг расмий муносабати деб қабул қилиш мумкин, дея ҳисоблайди Россия Фанлар академияси Шарқшунослик институти Корея ва Мўғулистон кафедраси мудири, Москва давлат халқаро муносабатлар институти шарқшунослик кафедраси доценти Александр Воронцов. Бу ҳақда «РИА Новости» хабар берган.

Фото: Bunshun

Yonhap агентлиги берган маълумотларга кўра, КХДР давлат радиоси 26 апрель тонгида мамлакат раҳбари Ким Чен Иннинг ўлими ҳақидаги хабарларга муносабат билдирган ҳолда унинг аҳволи яхшиланганини маълум қилди. Агентлик хабарида Ким Чен Ин ишчилар ва Самчжиён шаҳрининг бунёд қилинишида иштирок этган ходимларнинг ҳаммасига чин дилдан миннатдорлик билдиргани ҳақида радиода эълон қилинганлиги қайд этилган. Миннатдорликни Ким Чен Ин шахсан ўзи ўқидими ёхуд уни сухандон ўқиб эшиттирдими, бу ҳақда маълумот берилмаган.

«Ким Чен Иннинг фаол ишлаётгани ҳақида хабар қилишганини халқаро ОАВдаги информацион хайпга муносабат билдириш деб ҳисоблаш мумкин. Менимча, улар тахминан Ким Чен Ин ҳужжатлар устида ишламоқда, деган мазмунда реакция билдириши лозим эди», — деган Воронцов «РИА Новости»га берган интервьюсида.

Японияда нашр қилинувчи Shukan Gendai журналининг 24 апрель сонидаги мақоласида Ким Чен Инни операция қилган шифокорнинг асабийлашгани ва унинг қўллари титрагани, бир дақиқада тугаши зарур бўлган жарроҳлик амалиёти 7 дақиқа давом этгани ҳақида ёзилган.

Экспертнинг фикрича, Япония журналидаги ахборот КХДР раҳбарининг соғлиғи ҳақида бошқа халқаро ОАВ тарқатган янгиликлар каби ишончли эмас ва бир қатор шубҳа-гумонларни келтириб чиқармоқда.

«Ким Чен Ин соғми ёки унга нимадир бўлганми, каби саволларга келсак, бу классик схема: кўпчилик билмайдиган агент ёки агентлик ахборот майдонига нимадир ташлайди, бу тезда кўпайиб тарқала бошлайди. Шу тариқа бутун дунё ушбу воқеа кузатувчисига айланади, ҳатто обрўли нашрлар ҳам буни қайта чоп этади ёки шарҳлайди. Шу тариқа маълумот «гўшт»га айланади, тахминлар, миш-мишлар кўпаяди, қандайдир ахборот маҳсулоти тайёрланади. Бироқ бунда асосий манба ишончли эмас. Масалан япон журналидаги маълумотда гап қандай операция ҳақида кетаётгани, ким ва қандай асабийлашиб ушбу операцияни ўтказгани ҳақида тафсилотлар берилмаган. Ўз етакчисининг соғлиғи ҳақидаги ахборотнинг сизиб чиқишига йўл қўйилгани, яна бундай тафсилотлар билан операция хусусида гап тарқалгани, кореяшунос экспертларда катта шубҳа уйғотмоқда», — деган Воронцов.

Жанубий Кореянинг Daily NK нашри Ким Чен Ин операциядан кейин даволанаётгани ҳақида хабар қилгани, хориждаги бир қатор ОАВда Шимолий Корея етакчисининг соғлиғи хавф остида экани ҳақидаги хабарлар тарқалишига сабаб бўлган. Daily NK, шунингдек, CNN телеканали ва Япониянинг Shukan Gendai журнали ўз янгиликларида исмини ошкор этмаган манбаларга таянмоқда. Бу каби хабарлар ижтимоий тармоқларда КХДР етакчисининг ўлими тўғрисидаги миш-мишлар кўпайишига сабаб бўлмоқда.