Футбол бўйича Нидерландия чемпионатида мавсум охирига етмай тугатилди. Мамлакатда 75 йил ичида илк бор чемпион бўлмайди

Футбол бўйича Нидерландия чемпионатининг 2019/20 йилги мавсуми коронавирус пандемияси сабаб муддатидан аввал якунланди.

Унда чемпион ва мусобақани тарк этган жамоалар бўлмайди. Эредивизияда 1945 йилдан кейин илк бор чемпион номи аниқланмайдиган бўлди.

Европа Чемпионлар Лигасида «Аякс» (плей-офф босқичи) ва АЗ клублари (иккинчи саралаш босқичи) қатнашади. Ервопа Лигаси йўлланмаси ушбу жамоаларга тақдим этилди: «Фейеноорд» (гуруҳ босқичи), ПСВ ва «Виллем II» (иккинчи саралаш босқичи).

Коронавирус сабаб тўхтаб қолган Нидерландия чемпионатининг 25-туридан кейин 56 очко тўплаган «Аякс» пешқадам бўлиб турганди. Худди шунча очко тўплаган АЗ қўшимча кўрсаткичлар эвазига иккинчи ўринни банд этганди.

Сўнгги ўринларда «Ден Ҳааг» (19 очко) ва «Валвейк» (15) жамоалари бораётганди. Улар иккинчи дивизионга тушиб кетмайди. Ўз навбатида иккинчи дивизионда дастлабки икки ўринни эгаллаган «Камбюр» ва  «Де Графсхап» юқори лигага чиқмайди.

Шунингдек, Нидерландия Кубоги финали доирасидаги «Утреҳт»—«Фейеноорд» учрашуви ва аёллар чемпионати ҳам бекор қилинган.