Қозоғистон президенти Қосим-Жўмарт Тўқаев коронавирус пандемияси сабабли мамлакатда жорий қилинган карантин тугашининг эҳтимолий муддати ҳақида ўз фикрини билдирди. Бу ҳақда «Nur.kz» хабар берди.
«Ҳар қандай ҳолатда ҳам жорий ойнинг охиригача карантинни ушлаб турамиз, кейин эса ўйлаб кўрамиз», — дея маълум қилган Қозоғистон президенти Нур-Султондаги юқумли касалликлар шифохонасига ташрифи чоғида.
Унинг қайд этишича, Қозоғистон Собиқ Иттифоқ ҳудудида коронавирусга қарши зарур чоралар кўрган дастлабки давлатлардан бири бўлган. Шунингдек, давлат раҳбари коронавирусга қарши курашда иштирок этаётган шифокорларга миннатдорчилик билдирган.
Аввалроқ Қозоғистон бош вазири Асқар Мамин ҳукумат чеклов чораларини босқичма-босқич енгиллаштиришни режалаштираётганини маълум қилган. Сўнгги маълумотларга кўра, Қозоғистонда 2191 киши коронавирусга чалинган, 20 киши касалликдан вафот этган, 515 нафар бемор даволанишга муваффақ бўлган.
Изоҳ (0)