Ўзбекистон Марказий банки валютада кредит олган қарздорларнинг сўм девальвацияси натижасида кўрган зарарларини қопламайди. Бу ҳақда банк назоратчиси «Gazeta.uz» сўровига жавоб сифатида маълум қилган.
Марказий банк маълумотларига кўра, банклар тақдим этган 48,1 фоиз (104 триллион сўмга яқин) кредитлар хорижий валютада. Сўм курси эса 2019 йил апрелидан буён 20 фоизга пасайиб, АҚШ доллари 8390 сўмдан 10 137,94 сўмга қадар ошди.
Марказий банкдан валютада кредит олган қарздорлар учун имтиёзли валюта курсини жорий этиш ёки валютадаги кредитларни сўмга ўтказиш бўйича эҳтимолий режалар тўғрисида изоҳ бериш сўралган.
Бунга жавобан назоратчи қарздорларнинг сўм девальвациясидан кўрган зарарларини қоплаш, имтиёзли конвертация курсини жорий этиш ва валютадаги кредитларни имтиёзли курс бўйича сўмли кредитларга ўтказиш масаласи кўриб чиқилмаётгани ҳамда режалаштирилмаётганини маълум қилган.
Бунга сабаб сифатида таклиф этилаётган чораларнинг салбий оқибатлари мавжудлиги ҳамда халқаро молия институтлари (Халқаро валюта фонди ва Жаҳон банки каби) буни тавсия этмаётганини келтириб ўтган.
«Ҳар қандай молиявий восита, жумладан, валютадаги кредит муайян хатарларни (валюта риски, фоиз риски ва бошқа) ўз ичига олади. Барча хатарлар қарз олувчи томонидан валюта ёки бошқа турдаги кредитларни олиш бўйича қарор қабул қилиш вақтида мустақил равишда ҳар томонлама ҳисобга олиниши керак», — дея қайд этди Марказий банк.
Марказий банк коронавирус пандемияси вақтида қарздорларни қўллаб-қувватлаш учун банклар кредит бўйича тўловлар муддатини узайтириб, кечиктирилган қарздорлик бўйича пеня ва жарималарни ҳисобламаётганини таъкидлади.
Аввалроқ Ўзбекистон Марказий банки тижорат банклари ликвидлигини 10 фоизга оширишга рухсат берган эди.
Изоҳ (0)