Қарийб икки йил олдин YM Efficiency юк ташувчи кемаси томонидан Австралия қирғоқлари яқинида сувга тушиб кетган 80 та контейнернинг иккитасини ичидан бир жуфт Silverado пикапи топилди, деб хабар беради Autorambler.
2018 йили автомобиллар АҚШда кемага ортилган ва Австралияга жўнатилган. Newscastle Herald маълумотларига кўра, икки йил олдин пикапларнинг ҳар бирининг нархи (етказиб бериш билан) 150 минг Австралия доллари (91 минг АҚШ доллари) турган.
Австралия денгиз хавфсизлиги хизмати томонидан тақдим этилган суратларга кўра, океан остидан олиб чиқилган Silverado’га Duramax дизель двигателлари ўрнатилган.
«Табиийки, фалокат автомобилларга жиддий зарар етказган. Ойналари синган — икки йил сув остида бўлгани сабаб машина ичи чириб кетган», — дейилади хабарда.
Сув остидан чиқариб олинган бошқа контейнерлар ичидан шиналар, пўлат ва мис пластиналар ҳамда бошқа материаллар топилган, уларнинг барчаси қайта ишлашга юборилади. Пикаплар ҳам қисмларга ажратиб ташланади.
Апрель ойининг охирларида Австралия денгиз хавфсизлиги хизмати чўкиб кетган яна 62 та контейнерни сув остидан олиб чиқади. Контейнерларни сувдан чиқариб олиш, уларни тозлаш ва ажратиш мамлакат ҳукумати учун қарийб 10 миллион АҚШ долларига тушади.
Изоҳ (0)