Ван Персининг парвози, Хамес Родригеснинг шедеврлари билан эсда қолган ЖЧ—2014 даги энг чиройли 10 та гол (видео)

Коронавирус пандемияси сабаб дунё бўйлаб деярли барча спорт мусобақалари тўхтатилди. Шу жумладан, футбол бўйича мусобақалар ҳам. «Дарё» мухлисларнинг талаб ва таклифларини инобатга олган ҳолда турли мусобақаларда урилган энг сара голларни тақдим этиб боради. Ушбу лойиҳанинг навбатдаги сонида Бразилия майдонларида ўтган 2014 йилги Жаҳон Чемпионатида киритилган энг чиройли голлар тақдим этилади. Голлар рейтинги ФИФА талқинига кўра тузиб чиқилган.

10-ўрин. Жердан Шакири, гуруҳ босқичи | Гондурас—Швейцария 0:3

Шакирининг бенефесига айланган баҳс. Учрашувда Жердан ҳет-трик қайд этган ҳолда жамоасининг аутсайдер устидан йирик ғалабасини таъминлайди. Унинг биринчи голи эса чиройли чиқди: ўнг қанотдан марказ томон юрган Шакири чамаси 20 метр масофадан дарвозанинг тўққизлик бурчагини аниқ нишонга олди.

9-ўрин. Лионель Месси, гуруҳ босқичи | Нигерия—Аргентина 2:3

Аргентина қийин кечган баҳсда ғалабани ўз фойдасига ҳал қилади. Месси эса жарима зарбасини қойилмақом ижро этган ҳолда, жамоасининг ғалабасига ҳисса қўшади. Мессининг дубли ва Маркос Рохоннинг аниқ зарбаси аргентиналикларга уч очко тақдим этади. Қизиғи орадан тўрт йил ўтиб ЖЧ—2018 мусобақасида Месси яна бир бор Нигерия дарвозасига чиройли гол уради. Шунингдек, Рохонинг сўнгги дақиқалардаги голи Аргентинага ғалаба келтиради.

8-ўрин. Лионель Месси, гуруҳ босқичи | Аргентина—Босния ва Герцеговина 2:1

Кучли ўнликдан Мессининг яна бир голи ўрин олди. 3-дақиқада Сеад Колошинацнинг автоголидан кейин олдинга ўтиб олган Аргентина 65-дақиқада Леонинг ушбу голидан кейин ҳисобни мустаҳкамлайди. Таъкидлаш жоиз, Аргентина гуруҳ босқичидаги барча ўйинни бир тўп фарқи билан ўз фойдасига ҳал қилганди. Эронга қарши баҳсда аргентиналик даҳонинг 91-дақиқада урган голи Карлуш Кейруш шогирдларининг 90 дақиқалик меҳнатини бир пул қилганди.

7-ўрин. Давид Вилья, гуруҳ босқичи | Австралия—Испания 0:3

Мазкур жамоалар 3-турда тўқнаш келган ва бунга қадар амалдаги Жаҳон Чемпионлари икки бор мағлубиятга учраган ҳолда плей-офф йўлланмасидан маҳрум бўлганди. Испанлар бор аламини шу ўйиндан олган ва Вилья Хуанфраннинг узатмасига заргарона зарба берган ҳолда ҳисобни очганди.

6-ўрин. Тим Кеҳилл, гуруҳ босқичи | Австралия—Нидерландия 2:3

20-дақиқада гол ўтказиб юборган «кенгурулар» бунга бир дақиқа ўтар-ўтмас жавоб қайтаради. Тим нидерландларга Марко ван Бастен услубида гол уриш қандай бўлиши борасида «мастер класс» ўтаб берганди. Кейинчалик иккинчи тўпни киритган ОФК вакиллари ғалабани ушлаб қола олмайди ва гуруҳда қолиб кетади.

5-ўрин. Давид Луиз, 1/4 финал | Бразилия—Колумбия 2:1

Давид Луиз ўзининг бетакрор кучли зарбаси билан жарима тўпини голга айлантиради ва ЖЧ—2018 сенсацияси бўлган Колумбия эртагига якун ясайди. Кейинчалик Хамес Родригес ҳисоб қисқартиришга эришади, бироқ мусобақа мезбонлари ғалабани қўлдан чиқармайди ва Германияга қарши баҳс сари йўл олади. Кейин нималар бўлганини ўзингиз яхши биласиз...

4-ўрин. Марио Гётце, финал | Германия—Аргентина 1:0

Финал учрашувининг қўшимча бўлимларида захирадан майдонга қўшилган Марио Гётце мусобақанинг сўнгги голини чиройли тарзда киритиб, «немис машинаси»га чемпионликни олиб келади.

3-ўрин. Хамес Родригес, гуруҳ босқичи | Япония—Колумбия 1:4

ЖЧ—2014 мусобақасининг чинакам кашфиётига айланган Хамес Родригес Японияга қарши ўйиннинг сўнгги дақиқасида шундай голга муаллиф бўлади. Ундан аввал Хамес жамоасининг иккита голига ассистентлик қилади.

2-ўрин. Робин ван Перси, гуруҳ босқичи | Испания—Нидерландия 1:5

Бу голни эслаб қолмаган мухлис бўлмаса керак. «Учар голланд»дан ҳақиқий парвоз ва дунёнинг энг кучли дарвозабонларидан бири доғда қолдирилади. Мусобақанинг 1-туридан ўрин олган баҳсда Испания дастлаб олдинга ўтиб олади. Бироқ биринчи бўлим якунида ушбу голни қабул қилиб олган олган «қизил Фурия» шу билан ўзига кела олмайди ва иккинчи бўлимда ўз дарвозасидан яна тўртта тўп олиб чиқади.

1-ўрин. Хамес Родригес, 1/8 финал | Колумбия—Уругвай 2:0

Хамесдан яна бир шедевр! Колумбия етакчиси мазкур ўйин тақдирини ҳам ўзи ҳал қилган ҳолда терма жамоасининг тарихий натижасига ҳисса қўшганди. Хамеснинг бу ўйиндаги дастлабки голи эса мусобақанинг энг чиройли голи деб тан олинганди.