Муборак тумани ҳокимлиги ахборот хизмати раҳбари Зафар Жўраев ёлғон ахборот тарқатишда айбланмоқда. Бу ҳақда «Дарё»га шикоят қилган Жўраевнинг онаси Нилуфар Саломова ИИБ ўғлидан «нотўғри маълумот тарқатдим» деб тан олишини талаб қилаётганини билдирди.

Фото: «Дарё»

«Бизни кеча кечки пайт соат 21:00 да Қарши шаҳридан олиб келишганди. Ўғлимни ярим кечаси соат 03:00 да қўйиб юборишди. ‘Эрталаб соат 08:00 да шу ерда бўлишинг шарт’ дейишгани учун уйга кетолмай Муборак туманида қолдик. Кечаси билан кўчада ўтирдик. Келиним ҳомиладор, шу аҳволда кечадан бери сарсонмиз. Ўғлимга нима бўлди, аҳволи қандай билолмай оворамиз», — дейди Нилуфар Саломова.

Таъкидлаш лозим, 2020 йил 14 апрель куни Муборак туманида шифокорлар тўй қилгани, тўйда 50 нафар меҳмон иштирок этгани ҳақида хабар берилганди.

Аниқланишича, мазкур хабар дастлаб туман ҳокимлиги ахборот хизматининг расмий Telegram каналида эълон қилинган. Кейин ўчирилган.

«Соат 23:10. Бу пайтда қайдай пост қўйсам бўлади? Тўхтанг, мурожаат келиб тушди. Бугун Муборак туманида шифокорлар қуда бўлишибди! Туман ҳокими, сектор раҳбарлари Муборакда шунча ишларни амалга ошириб турган пайтда, шунча тарғибот, ташвиқот ишлари давом этаётган карантин пайтида жўнатилган бу мурожаат очиғи бизни ҳайрон қолдирди. Мурожаат қанчалик асосли, эртага аниқлик киритамиз...», — дейилади ахборот хизмати тарқатган расмий хабарда.

Вазиятни изоҳлаган вилоят ИИБ ахборот хизмати раҳбари Ирода Расулова Зафар Жўраев унга қўнғироқ қилиб, туманда карантин пайтида тўй бўлаётгани ҳақида мурожаат келиб тушганини айтган. Расулова эса туман ИИБ раҳбарининг телефон рақамини бериб, «ИИБ раҳбари ва туман ҳокимига бу ҳақда тезда хабар беринг» деган.

Зафар Жўраев туман ҳокими ва ИИБ раҳбарига бу ҳақда хабар қилган-қилмагани бизга қоронғи. Аммо Нилуфар Саломованинг айтишича, ўғли бу ҳақда мутасаддиларга айтган.

«Бу ҳақда интернетда ўқидим, Зафар Жўраев тўй бўлгани ҳақида менга хабар бермаган», — дейди Муборак тумани ҳокими Ғайрат Жовлиев.

Ғайрат Жовлиев.

Фото: «Дарё»

Ғайрат Жовлиевнинг айтишича, у тўй ҳақидаги хабар ҳокимлик ахборот хизмати расмий каналида эълон қилинганини кўрмаган. Канални ўқимаган.

«Ўша куни қишлоқ хўжалиги ишлари билан туманнинг чекка ҳудудида бўлганман, шунинг учун ҳам хабар қўйилганини кўрмай қолдим. Хабар интернетда тарқалгач, билдим», — дейди Муборак тумани ҳокими.

Зафар Жўраев эса карантин пайтида туманда тўй бўлгани ҳақида барча масъулларга хабар берганини таъкидламоқда.

«Ҳаммага хабар бердим ва кейин каналимизда бу ҳақда ахборот ёздим. Ахборотда бу хабарга ойдинлик киритилиши ҳақида қўшимча қилганман», — дейди Зафар Жўраев.

Зафар Жўраев.

Фото: «Дарё»

Зафар Жўраевнинг айтишича, бу хабар ортидан бир неча киши жазоланишини билган мутасаддилар барча айбни унга ағдариб, сувдан қуруқ чиқишга уринмоқда.

«Туман ҳокимлиги ахборот хизмати мустақил ва бор муаммони борича кўрсатиши керак, деган фикрда карантин қоидаларига амал қилмаган шифокорлар ҳақида ёздим. Энди эса айбдор сифатида икки кундан бери ИИБ биносида сўроқ беряпман. Овқат ҳам беришмай, оч ушлаб туришибди. Айбим, ҳақиқатни ёзганимми?», — дейди Зафар Жўраев.

«Дарё» мухбири билан телефон орқали мулоқот қилган Зафар Жўраев айни пайтда тоби қочиб, туман шошилинч тиббий ёрдам бўлимига олиб келинганини билдирди.

Зафар Жўраев туман ИИБда уни оч олиб ўтиришгани учун тоби қочганини айтар экан, унга ҳеч ким қулоқ солмаётганидан шикоят қилди.

Вилоят ИИБ масъули Ирода Расулованинг таъкидлашича, туман ҳокимлиги ахборот хизмати маълумотни текширмасдан оммага тарқатган. Ва шошма-шошарликка йўл қўйган.

«Дарё» мухбири билан суҳбатлашган манбаларнинг тасдиқлашича, айтилаётган манзилда ўша куни тадбир бўлиб ўтган. Лекин тадбирда 50 нафар киши иштирок этмаган. Тадбир меҳмонлари 10 нафарга яқин киши бўлиб, келинни куёвнинг уйига олиб боришган.

Яна бир манбанинг маълумот беришича, тўй бўлгани ҳақида туман ҳокимлиги ахборот хизматига хабар берган аёл М.Қ. ва тўй қилгани айтилаётган фуқаролар ўртасида келишмовчилик бўлган. Шу сабабдан ҳам кичик тадбирни тўй дейишган.

«Иккинчи томон ҳақиқатан ҳам тадбир қилган бўлса, эпидемия қоидасига риоя қилмагани боис, жавобгарликка тортилади. Туман ҳокимлиги ахборот хизмати раҳбарига ахборот берган фуқаро М.Қ. ва ҳокимлик масъули шошма-шошарлиги, ахборотни текширмасдан эълон қилгани учун жавобгар бўлиши тайин», — дейди вилоят ИИБ ахборот хизмати раҳбари.

Вилоят ИИБ ахборот хизматининг қўшимча қилишича, мазкур иш 16 апрель, пайшанба куни, Муборак туман Маъмурий судида кўриб чиқилади.

Муаллиф:Отабек Қўлдошев