Давлат божхона қўмитаси ахборот хизматининг «Дарё»га маълум қилишича, 2020 йил 12 апрель куни Давлат божхона қўмитаси ва ДХХ ходимлари ҳамкорлигида ўтказилган тезкор тадбир давомида қиймати 20 миллиард сўмлик тамаки маҳсулотларининг ноқонуний равишда олиб кирилишига чек қўйилди.
Маълум қилинишича, Ўзбекистонга олиб кирилиши режалаштирилиган йирик миқдордаги сигарет маҳсулотлари юкланган автотранспорт воситасини ҳужжатларда гўёки юксиз ҳолатда кўрсатиб, Сурхондарё вилоятидаги «Гулбаҳор» чегара божхона постидан ўтказиш эвазига божхона ходимига 10 500 АҚШ долларини пора тариқасида таклиф этган уюшган жиноий гуруҳ қўлга олинди.
Тезкор тадбирда қўшни давлатдан кириб келган фуқаро Д.У. бошқарувидаги юк автотранспорт воситаси Термиз тумани ҳудудида тўхтатилиб, кўздан кечирилганида автотранспорт юкхонасига жойлаштирилган контейнер ичида ҳеч қандай ҳужжатлари бўлмаган 749 900 қути Golden Club сигарети борлиги аниқланган.
Ушбу жиноий режани тузишда иштирок этган ва уни амалга амалга ошириш мақсадида қулай фурсатни кутиб Сурхондарё вилоятида яшириниб юрган Н.З., Н.А., А.А. ва М.Н. исмли жиноий гуруҳ аъзолари ҳам тезкор тадбир давомида қўлга олинган.
Шунингдек, божхона ходими билан келиш учун воситачилик қилган фуқаро Р.Ч. ҳам ўзининг яшаш хонадонида ушланган ва воситачилик қилганлиги эвазига ҳайдовчи Д.У. томонидан берилган 5 400 АҚШ долларини ашёвий далил сифатида топширган.
Божхона қўмитаси маълумотига кўра, ушбу жиноий гуруҳ аъзоларининг режалари амалга ошса, давлат бюджетига 11 миллиард 349 миллион сўм миқдоридаги божхона тўловлари ўтказилмай қолиши мумкин эди.
Ҳозирда мазкур ҳолат юзасидан Давлат божхона қўмитаси томонидан Ўзбекистон Республикаси Жиноят кодексининг 182 (Божхона тўғрисидаги қонунларни бузиш), 211-моддалари (Пора бериш) билан жиноят иши қўзғатилиб, тегишли тергов органига юборилди.
Изоҳ (0)