Ўзбекистонда карантин қоидаларига амал қилмаганлар сони 60 мингга яқинлашди
Ўзбекистонда карантин тадбирлари эълон қилинган вақтдан бугунги кунга қадар карантин қоидаларига амал қилмаслик билан боғлиқ жами 59 921 та ҳолат аниқланди, деб хабар бермоқда ИИВ матбуот хизмати.
Қайд этилишича, энг кўп — 10 100 та қоидабузарлик Тошкент шаҳрида қайд этилган. Тошкент вилоятида эса бундай ҳолатлар сони 8 588 тани ташкил этмоқда. Республика бўйича аниқланган қоидабузарликлар эса қуйидагича:
- Фарғона вилоятида — 8 644 та ҳолат;
- Самарқанд вилоятида — 5 712 та ҳолат;
- Сирдарё вилоятида — 4 381 та ҳолат;
- Қашқадарё вилоятида — 4 188 та ҳолат;
- Андижон вилоятида — 3 457 та ҳолат;
- Наманган вилоятида — 3 416 та ҳолат;
- Бухоро вилоятида — 2 412 та ҳолат;
- Қорақалпоғистон Республикасида — 2 187 та ҳолат;
- Жиззах вилоятида — 2 115 та ҳолат;
- Сурхондарё вилоятида — 2 053 та ҳолат;
- Хоразм вилоятида — 1 997 та ҳолат;
- Навоий вилоятида — 671 та ҳолатни ташкил этмоқда.
Шу куни Фарғона вилояти, Марғилон шаҳар, Боғчасарой кўчасида яшовчи 25 ёшли Ф.Д. ИИО ходимларининг қонуний талабларини бажармасдан карантин қоидаларини бузиб, маст ҳолатда майда безорилик содир этган.
Уларга нисбатан Маъмурий жавобгарлик тўғрисидаги кодекснинг 54-модда (Эпидемияларга қарши кураш қоидаларини бузиш), 183-модда (Майда безорилик), ва 194-модда (Ички ишлар органлари ходимининг қонуний талабларини бажармаслик)лари асосида маъмурий ҳужжатлар расмийлаштирилиб, 15 сутка маъмурий қамоқ жазоси тайинланган.
Наманган вилояти Поп туманида яшовчи 49 ёшли М.У. ИИО ходимларининг қонуний талабларини бажармасдан карантин қоидаларини бузиб, маст ҳолатда майда безорилик содир қилганлиги учун унга нисбатан Маъмурий жавобгарлик тўғрисидаги кодекснинг 54, 183, ва 194-моддалари асосида маъмурий ҳужжатлар расмийлаштирилиб, 1 115 000 сўм жаримага тортилган.
Эслатиб ўтамиз, коронавирус инфекцияси тарқалишига қарши кураш доирасида Тошкент шаҳри ва бир қатор шаҳарларга транспортнинг кириш-чиқиши чекланди, вилоятлараро транспорт ҳаракати тўхтатилди. Бундан ташқари, шахсий автомобилда махсус рухсатномасиз ҳаракатланиш тақиқланди, фуқароларга заруратсиз уйдан чиқмаслик тавсия этилди.
Шунингдек, 6 апрелдан бошлаб Тошкент шаҳрининг 11 та туманидаги 514 та маҳалла қошида карантин тартибини назорат қилувчи «Жамоатчилик назорати маскани» ташкил этилди.
