Марғилон шаҳридаги деҳқон бозори ҳудудида ИИБ пост-патрул хизмати ва жамоат тартибини сақлаш бошқармаси ходими калтакланди. Бу ҳақда Бош прокуратура матбуот хизмати «Дарё»га маълум қилди.
Маълум бўлишича, 12 апрель куни соат 15:30 да вилоят ИИБ ППХ ва ЖТСБ ходими бозор ҳудудидаги автотураргоҳга кириш қисмида юзига ниқоб тақмай нон сотаётган 18 ёшли Д.Қ.дан ниқоб тақиб олишни талаб қилган.
Бунга жавобан, Бош прокуратура ахборотида таъкидланишича, фуқаро ИИБ ходимининг юз ва оёқ соҳаларига уриб, тан жароҳати етказган. Жараённинг бошқа тафсилотлари маълум қилинмаган.
Қайд этишларича, мазкур ҳолат юзасидан 13 апрель куни Марғилон прокуратураси томонидан Д.Қ.га нисбатан Жиноят кодексининг 219-моддаси 1-қисми (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган.
Маълумот учун, ушбу модда билан айбдор деб топилган шахслар базавий ҳисоблаш миқдорининг 50 баравари (11,1 миллион сўм)гача миқдорда жарима ёки 360 соатгача мажбурий жамоат ишлари ёхуд 3 йилгача ахлоқ тузатиш ишлари ёки 1 йилгача озодликни чеклаш ёки 1 йилгача озодликдан маҳрум қилиш билан жазоланади.
Эслатиб ўтамиз, Ўзбекистонда 25 мартдан бошлаб жамоат жойларида шахсий ҳимоя воситалари (ниқоб)сиз юрган шахслар жаримага тортилмоқда. 6 апрелдан бошлаб эса ўта заруратсиз кўчага чиқиш чекланган.
Изоҳ (0)