Бухоро вилоят юқумли касалликлар шифохонасида коронавирусга чалинган тўрт нафар бемор бутунлай соғайди. Соғлиқни сақлаш вазирлиги хабарига кўра, улар 14 апрель куни вилоят Соғлиқни сақлаш бошқармаси масъуллари иштирокида реабилитацияга кузатилган.
Соғайганлардан (барчаси эркак) уч нафари (икки нафари Тошкент шаҳридан, бир нафари самарқандлик) чартер рейс орқали Туркиядан Бухорога келган. Яна бир нафари эса қашқадарёлик бўлиб, чартер рейс орқали Россиядан Бухорога олиб келинган эди.
Қайд этишларича, уларнинг бари карантинда бўлган ва коронавирус инфекцияси аниқлангач, вилоят юқумли касалликлар шифохонасида даволанишни бошлашган. Бухорода бундан аввал ҳам коронавирусга чалинган тўрт бемор соғайгани маълум бўлган эди.
Шундай қилиб, 14 апрель соат 12:00 ҳолатига кўра Ўзбекистон бўйлаб коронавирус инфекциясидан соғайганлар сони 89 нафарни ташкил этмоқда.
Изоҳ (0)