Беларусда коронавирусга чалинган 29 киши вафот этди. Лукашенко уларнинг ўлимига коронавирус сабаб бўлмаганини айтди

Беларусь президенти Александр Лукашенконинг маълум қилишича, мамлакатда коронавирусга чалиниб, вафот этганларнинг ўлимига мазкур инфекция эмас, балки «сурункали касалликлар тўплами» сабаб бўлган. Бу ҳақда мамлакат президентининг расмий сайтида хабар берилди.

«Одамлар қўрқмоқда. Шунинг учун мен уларга қуйидагиларни айтмоқчиман: мамлакатда бирорта ҳам одам коронавирусдан ўлмади. Бирорта ҳам. Улар ўзида бўлган сурункали касалликлар тўпламидан ўлди. Коронавирус — бу ҳатто туртки ҳам эмас. Бу уларнинг сурункали касалликлари ривожланган атмосфера. Мана, сабаб нимада. Шунинг учун айтяпманки, бизда айнан коронавирусдан ҳеч ким вафот этмади», — деган Лукашенко.

Унинг сўзларига кўра, коронавирусга чалинган баъзи кишилар шу даражада ваҳима қилмоқдаки, ҳатто коронавирусни аниқлаш бўйича текширув натижалари ижобий чиққан кишилар ҳам ҳаёт учун курашмай қўйди.

«Ҳатто қайғуришмасин ҳам. Бизнинг мамлакатда ҳеч ким коронавирусдан ўлмайди. Мен буни омма олдида маълум қиляпман. Бу менинг таҳлиллардан келиб чиққан қатъий ишончим. Бизда жорий йилнинг тажрибаси бор. Биз одамларни қутқариш учун дорилар комбинациясини топдик. Шунинг учун ҳар бир киши учун курашмаймиз, балки жанг қиламиз. Агар бирор одам тақдирга тан бермаган бўлса, у, албатта, тузалади», — дея баёнот берган Лукашенко.

Беларусь Соғлиқни сақлаш вазирлигининг маълумотларига кўра, 13 апрель ҳолати бўйича мамлакатда 2919 кишида коронавирус аниқланган, 203 киши тузалган, 29 киши вафот этган.

Беларусда кенг қамровли карантин чоралари жорий қилинмаган. Мамлакат чегаралари очиқ, давлат ва хусусий компаниялар иш фаолиятини давом эттирмоқда. Мамлакатда футбол чемпионати давом этмоқда.

Коронавирус сабабли Беларусь ҳукумати хориждан келганларга нисбатан «ўзини яккалаш» режимини татбиқ қилмоқда. Мамлакатда хорижликлар иштирокидаги оммавий тадбирлар тақиқланган, мактабларда таътиллар узайтирилган ва касалхоналарда режалаштирилган операциялар ва муолажалар қолдирилган. Қолган ҳолатларда тавсиялар билан чекланилмоқда: одамлар кўп тўпланадиган жойларга бормаслик, масофа сақлаш, масофадан ишлаш.

Аввалроқ Ўзбекистон Беларусга коронавирусга қарши курашда фойдаланиш учун инсонпарварлик ёрдамини жўнатгани ҳақида хабар берилган эди.